Miresulta sa maayong pakigsabot alang sa mabungahong pakig-alayon tali Davao del Norte ug panggamhanan sa nasud Japan ang pagbisita ni Consul General Yoshihisa Ishikawa sa probinsya, Mayo 26.

Gidayeg ni Ishikawa ang kahapsay ug kalinaw sa Davao del Norte hinungdan nga buot niya nga maapil ang probinsya sa mga lugar sa Pilipinas nga mahimong investment partner sa ilang nasud.

“Peace and order here is very good and no insurgent problem. That is very good for Japanese investors and tourists. So, I really want to advertise the chance of Davao del Norte,” dugang pa sa Consul General.

Sa kasamtangan, kadaghanan sa mga Japanese investors naka-pokus sa nasud China. Matud ni Ishikawa, buot sa Japan nga mamuhunan sa mga nasud sa Southeast Asia sama sa Indonesia, Thailand, Malaysia, Vietnam ug Pilipinas ilabi na sa Mindanao nga adunahan sa natural nga kahinguhaan.

Dakong garbo ug kalipay nga gidawat ni Governor Edwin “Kuya Gov” Jubahib kauban ang mga department heads ug chiefs sa probinsyal nga panggamhanan ang pagbisita sa Consul General. Sa iyang mensahe, gitagaan og gibug-aton sa gobernador ang kadaugan sa iyang administrasyon sa pagtutok sa suliran sa insurhensiya nga miresulta sa paglig-on sa produksyon sa agrikultura, turismo, kalinaw, kahapsay, ug uban pang matang sa ekonomikanhong kalamboan.

Writer: Mervin Jay Z. Suaybaguio

 

 

 

 

 

DavNor News

nainggo