'Insurgency-free' na ang Davao del Norte kay bungkag na ang mga guerilla unit sa mga rebeldeng New People’s Army (NPA) nga naga-operate sa probinsiya.
Atol sa selebrasyon sa probinsiya sa 124th Independence Day, gibutyag ni 10th ID Commander Maj. Gen. Nolasco Mempin nga sa pagkabungkag sa Guerilla Front (GF) 3 sa mga NPA sa milabay nga bulan sa Abril 2022, wala nay nabilin nga pwersa sa mga rebelde sa lalawigan.
Tungod niini, gideklara sa Provincial Peace and Order Council (PPOC), pinaagi sa Resolution Number 08 series of 2022, nga ang probinsiya sa Davao del Norte ug mga dakbayan ug lungsod ubos niini "insurgency-free province" na.
Sulti sa heneral nga sa tuig 2016 duna pay upat ka mga guerilla fronts ug usa ka vertical unit ubos sa duha ka Sub-Regional Commands sa NPA nga nagtikawtikaw sa mga kabukiran sa Davao del Norte.
Kini ang GF 3, GF 33, GF 34, ug Pulang Bagani Command (PBC)-4, nga ubos sa Sub-Regional Command (SRC) 4 sa Southern Mindanao Regional Committee (SMRC) ug ang Regional Command 55-SRC 5, ubos gihapon sa SMRC.
Apan nahimong posible ang pagdistrungkar niini nga mga pwersa sa mga rebelde tungod sa tutok kaayo nga operasyon sa militar ug gipakusog nga programa ni Pangulong Rodrigo Duterte nga ending local communist-armed conflict (ELCAC), uban sa bug-os nga suporta sa probinsya, mga ahensiya sa gobyerno, local government units (LGUs) ug tanang hut-ong sa katawhan.
Ingon ni Mempin nga kining kadaugan sa probinsiya nagapakita sa hiniusang paningkamot ug desisyon sa katawhan aron malibre gikan sa kadaot sa komunismo ug terorismo.
“It is a representation of our collective efforts and decision to make the province free of the evils of communism, terrorism and finally be able to move forward with long-lasting peace and genuine development,” sulti sa heneral.
Gidayeg ni Governor Edwin “Kuya Gov” Jubahib ang pagpakabayani sa mga kasundaluhan ug kapulisan, uban sa tabang sa mga ahensiya ug mga LGUs aron makab-ot ang kalinaw.
“Nahimong zero recruitment rate na ang mga NPA dinhi sa atoang probinsiya. Ug less than five percent visibility na jud ang ilang puwersa sa atong mga kabukiran… Tungud sab kana sa atong paningkamot alang sa tinuoray nga kabag-ohan ug tinuod nga kalamboan,” sulti niya.
Dakong tabang ang daghang mga proyekto nga gibubo sa probinsiya ug sa nasyonal nga panggamhanan sa mga lagyong komunidad sa mga IPs aron misurender ang kapin 3,000 ka mga rebeldeng NPA ug mga miyembro sa Militia ng Bayan sa probinsiya.
Apil niini ang mga bag-ong dalan, eskwelahan, health centers ug ubang pang imprastraktura, kuryente, panginabuhian, pabalay sa mga IPs, ug uban pa.
Sa maong okasyon, gipangunahan sab sa mga opisyal ang pagtagtag sa financial assistance sa mga kanhi rebelde nga mibalik sa sabakan sa gobyerno, ubos sa programang Enhanced Comprehensive Local Integration Program (E-CLIP). Gipahigayon sab ang seremonyas sa pag-introgo sa susi sa bag-ong pabalay alang sa mga kanhi rebelde.
