GITAWAG ni Davao del Norte Gobernador Edwin “Kuya Gov” Jubahib nga “bayani” ang mga mag-uuma atol sa Farmers Day 2022 didto sa New Corella Martes, Hunyo 14.

“Wala pa migimaw ang adlaw sa kabuntagon anaa na kamo nagtikaw-tikaw sa inyong kaumahan. Kamo mga bayani nga malahutayong nakigbisog matag-adlaw aron dunay makaon ang atong katawhan. Bisan unsay lakat sa panahon ug luyo sa dagkong mga hagit sa kinabuhi, kamo padayon sa pag-ugmad aron masiguro nga dunay pagkaon ang matag pamilya,” matod sa mensahe ni Kuya Gov nga gipaabot pinaagi ni Executive Assistant Leomel Puerto.

Ingong suporta sa mga mag-uuma, batasan na sa LGU New Corella nga maglain og adlaw para sa maong sektor sa dili pa ang ilang “Araw” matag Hunyo 18 apan gumikan sa pandemya, kini wala mahimo sa mga tuig 2020 ug 2021.

“That is why, I congratulate the municipal government headed by Mayor Monet for holding this meaningful token of the town’s appreciation of the industriousness, efforts, and sacrifices of our farmers in feeding our people here. Our farmers deserve all the tribute for the great role they play as the backbone of our society,” dugang sa mensahe ni Kuya Gov.

Naobserbahan dayon ni Mayor Jorjan Federiso ang kahinangop sa katawhan sa mga produkto sa uma sa pagbalik sa Farmers Day nga subling nagpasalig sa suporta sa iyang administrasyon.

“Perte gyod nilang lipaya kay wala sila magdahom, natingala nga ing-ana gyod ka-suportado ang katawhan kay gihurot gyod ang ilang gulay, kanang display gamay na lang na kay ubay-ubay gyod ang namalit. . . Sa pagsugod sa among administrasyon, sa tinuod lang gihatagan namo og dakong bili ang atong kaigsoonang farmers kay dako kaayo mo’g kalambigitan sa atong lungsod, sa atong komunidad, dako kaayo mo’g kontribusyon,” matod sa Mayor nga nagsaad ipadayon ang pagtabang sa mga mag-uuma pinaagi’g libreng water pumps, fertilizers ug libreng semilya ngadto sa mga tigtanom og gulay apan labaw sa tanan ang gipadako nga budget para sa agrikultura sa lungsod.

“By next year, ato nang i-implement nga mag-rice buying na ang atong LGU. Gibutangan na nato na og budget. . syempre sa presyo nga dili mo magmahay,” dugang ni Mayor Federiso nga wala magbutyag kung pila ka milyon ang pasiunang pondo.

Gipasalig sab ni Gobernador Jubahib sa iyang mensahe nga ang food-sufficiency program KAAGAPAY ingon man ang gisugdan nga rice buying sa probinsya iyang ipadayon ingong suporta sa mga mag-uuma.

“Luyo sa atong kasadya karon, mao ang akong pasalig sa padayon nga suporta sa akong administrasyon sa agrikultura. Atong pakusgon ang mga programa ug proyekto sa agrikultura, apil ang KAAGAPAY program ug rice-buying program, aron matabangan paglambo ang produksiyon ug kita sa atong mga mag-uuma. Dugangan nato og pundo ang mga hinabang alang sa atong mga mag-uuma ug mga kooperatiba, sama sa abuno ug ubang inputs, trainings, teknolohiya, kapital ug uban pa.” (camera/carlsingson)