HANGTOD Hunyo 30, 2022 na lang ang Provincial Health Office Team nga moapil sa RESBAKUNA.

Ug kana nagdepende pa gyod kung nianang adlawa walay mogamit sa DavNor Gym diin ginapahigayon ang pag-pangbakuna gumikan sa mga kalihokan sa ika-55 nga Araw ng Davao del Norte pagka Hulyo 1. Busa ang kataposang RESBAKUNA mahimong hangtod na lang sunod Huwebes ug Byernes, Hunyo 23 ug 24.

Wala hinuon kini magpasabot nga ang PHO Team dili na gyod mang-bakuna apan andam gihapon nilang itunol ang serbisyo niadtong mag-request nga grupo o institusyon diin daghang tawo ang mabakunahan kontra COVID-19.

Sa pagsunod sa mando ni DavNor Gobernador Edwin “Kuya Gov” Jubahib nga mapadali ang pagpangbakuna, kahinumduman nga sa nagtaas ang gidaghanon sa natakdan sa sakit nga COVID-19, abtik sab nga gidugangan (augment) sa DavNor PHO RESBAKUNA Team ang mga LGU nga dyutay ra og mga health personnel sama sa Braulio E. Dujali ug New Corella.

Sa makadaghang higayon mihimo sab ang PHO RESBAKUNA Team og Vaccination Outreach diha sa mga eskwelahan, prisohan ug bisan sa mga relihiyosong pundok.

Gisaysay ni DavNor RESBAKUNA focal person Neidel Feah Ferido nga ang paghunong maoy gumikan sa nagkagamay na ang magpabakuna [first, second ug booster] ug aron makabalik na sab sa gitutokan nga mga programa sa panglawas ang mga personahe nga nagserbisyo matag Huwebes ug Byernes.

Sa positibong balita, hangtod niadtong Lunes Hunyo 13, nakab-ot na gyod sa DavNor RESBAKUNA ang 78.6% first dose ug 70.2% second dose (lakip na ang booster shots) nga nagpasabot lamang nga naabot na ang “herd immunity” [70%] sa angayan (eligible) nga populasyon nga bakunahan nga 863,163 ka tawo.

Apan bisan pa niana, ang pagdeklarar kung unsa nga “Alert Level” ang usa ka LGU nagdepende gihapon sa national COVID-19 Inter Agency Task Force (IATF).

******************///

 

 

 

Hangtod Hunyo 13, 2022, sobra 70% na sa DavNor eligible population ang nakadawat first ug second dose lakip ang booster shots kontra COVID-19. 

 

DavNor News

nainggo