Davao del Norte--- GIDASIG sa DavNor EWDD ug DNIPC ang mga People’s Organizations ilawom sa KAAGAPAY nga mangita og laing alternatibo aron mokita bisan ginagmay gumikan sa kalisod sa ekonomiya dala sa COVID-19 ug pagsaka sa presyo sa lana sa tibuok kalibotan.

Ang EWDD (Employment Workforce Development Center) ug DNIPC (Davao del Norte Investment Promotion Center) maoy mga opisina sa Kapitolyo ilalom sa Provincial Administrator’s Office (PADO) samtang ang KAAGAPAY (KAwsa sa AGrikulturA ug PAnginabuhian sa barangaY) ilawom sa Provincial Governor’s Office maoy food-sufficiency program ni Gobernador Edwin “Kuya Gov” Jubahib.

Sobra na P40 Milyones nga pondo sa ‘TUPAD’ o Tulong Panghanapbuhay sa Ating Disadvantaged/Displaced Workers ang “nasungkit” ni Kuya Gob sa DOLE gawas sa Cash-for-Work gikan sa DSWD aron matabangan ang mga marginal Dabaonon lakip ang sobra 10,000 ka miembro sa mga KAAGAPAY POs. Ug ning bag-ong nasyonal administrasyon wala pa mahibaloan kung ang TUPAD ipadayon ba.

“Naa mi isa ka PO Purok Paglaum (Salvacion, Sto. Tomas), recipient na sila sa KAAGAPAY manok. . Ang akong gibuhat in my own capacity ako silang gihimong laboratory, meaning gi-eksperimentohan nako sila. Adtong May 1, gitudloan nako sila’g buhat og banana chips. Gipalitan nako’g mantika, gipalita’g packaging, gipa-attend og meeting during sa Labor Day sa Sto. Tomas. Tuod man gikan adtong May 1 nakapadayon na sila’g himo’g banana chips. Naay mag-order tag 200, 300 packs; ilaha na ginahimo every other day. So kung naa lang 200 packs nga banana chips at ten pesos, pilay ilang kita in a day? Two thousand. Karon pila na ang ilahang kita? Almost eight thousand gikan adtong May 1. . . So mao na ang another alternative way of motivating them. Kay kabalo man ta unsa kalisod ang panahon karon. Dili lang ang Covid, dili lang ang fuel nagataas, kailangan gyod ta manglimbasog,” matod ni EWDD Division Chief Ms. Gloria Excelsa Pamugas ngadto sa mga KAAGAPAY staff nga magdala sa mensahe ngadto sa mga POs niadtong Byernes, Hunyo 17.

“Seguro dili lang nato i-focus ang hunahuna sa TUPAD. Kay kanang pag-release sa TUPAD dili man nato kontrolado. Ato segurong i-divert ang atong panghunahuna sa laing pamaagi nga makahatag ta’g assistance sa ilaha. Ang pag-organize sa isa ka PO dako na kaayo na siya nga asset nga pwede natong mabuboan og assistance. (Kini) Laing pamaagi nga atong makontrol kay sa magsige ta’g hulat nga wa ta kabalo kung kanus-a moabot, ug kung moabot ba,” dugang ni Ms. Pamugas.

Kami willing mi, willing mi motudlo pero akong i-suggest pod nga kung natudlo na ni dinhi ang banana chips, didto sa pikas di na pod seguro banana chips atong itudlo. Kami sa EWDD willing mo-assist,” pasakig sa EWDD chief nga naghisgot sa Pagsabangan KAAGAPAY PO nga karon naghimo na’g “pickles.”

Mipasalig sab si DNIPC Chief Joevy Miedes nga andam kaayo ang ilang opisina alang sa packaging ug labeling trainings sa mga POs.

*************////