SUGDAN na ang rehabilitasyon ug ang pagsemento sa 2.7 kilometros karsada gikan sa Sitio New Agno, Mabantao hangtod sa Sitio Mabuhay, Capungagan, hilit nga mga barangay sa lungsod sa Kapalong, Davao del Norte.

Kini human “gilubong ang kapsula” timaan sa pagsugod sa proyekto Lunes, Hunyo 20, 2022 didto sa Sitio Mabuhay.

Gipondohan sa Rural Agro-Enterprise Partnership for Inclusive Development and Growth (RAPID Growth) nga programa sa Department of Trade & Industry (DTI) ang maong proyekto uban ang counterpart nga P3M sa LGU Kapalong nga sa tibuok Rehiyon XI, ang LGU ang pinakaunang benepisyaryo.

Tumong sa proyekto nga mahatagan suporta ang hilit nga mga mag-uuma pinaagi sa sementadong karsada aron mapasayon ang pagdala sa mga abot sa umahan padulong sa baligyaanan ilabina ang cacao. Gawas sa liso (cacao beans) mapasayon sab ang “value-adding” niini nga produkto.

Ang 2.7 kilometros sementadong karsada direktang maghatag kasayon sa 1,670 ka mga residente sa nahisgotang lugar lakip ang 263 gagmay’ng mag-uuma gawas nga mahimo unya kining importanteng agianan ilabina sa mga estudyante. Ang karsada magpasayon sab sa mga mag-uuma paghatod ngadto sa Cacao Processing Facilities sa Kapalong Coop.

Una niini, nakadawat na ang mga cacao farmers sa Capungagan og Fermentation facilities (dryer) aron ipa-uga ang mga liso sa cacao. Gawas sa mga Shared Service Facilities motabang sab ang DTI alang sa training, market exposure, market promotion ug ubang matang sa assistance ngadto sa mga mag-uuma.

Sa iyang mensahe, dako gayod ang pasalamat ni Kapalong Mayor Maria Theresa Timbol sa nadawat nga proyekto uban sa pag-awhag sa mga mag-uuma nga magkugi pagtanom.

“With this concrete road sigurado ko, syempre mo-benefit ang atong cacao farmers but all farmers nga agian aning karsada makatanom na sila’g maayo kay makagawas naman ang ilang produkto with a lesser cost sa pag-transport. Dako kaayo’g matabang sa Local Government kay grabe kaayo atong paningkamot nga mabuhi’g balik ang ekonomiya sa lungsod, and kabalo ta ang atong lungsod is agricultural nga munisipyo. . . Aside from the pandemic, we are faced again with another big, big problem with the rising cost of fuel. Kabalo ta unsay effect ani. Dili pwede nga paliton nato tanan. Lapad kaayo atong kayutaan dire; all we have to do is plant, plant, plant,” pahayag ni Mayor Timbol.

Sa pagtambayayong sa nasyonal, probinsyal ug local nga mga ahensya, magpasayon sab ang konkretong karsada sa gatosan ka mga mag-uuma sa Mabantao ug Capungagan nga miduyog sa programang KAwsa sa AGrikulturA ug PAnginabuhian sa barangaY (KAAGAPAY), ang food-sufficiency program ni Gobernador Edwin “Kuya Gov” Jubahib alang sa pagtanom og mga gulay, pagbuhi’g manok ug ang Tilapia Inland Fish Production alang sa seguridad sa pagkaon.

Ang groundbreaking gitambongan ni DTI Undersecretary Blesila Lantayona, RD Belinda Ambi, Asst RD Delia Ayano, Provincial Director Romeo Castañaga, DILG Provincial Director Jonathan Leybag, Kapalong Coop chairperson Atty Rosario R. Dayaday, Mayor Timbol ug ubang mga opisyales.

****************///

Ang blue print (plano) sa karsada gisulod alang sa capsule laying

Pinirmahay sa kasabutan alang sa P48 Milyones Capungagan-Mabantao karsada 

DavNor DTI PD Romeo Castanaga 

DTI Usec Bles Lantayona & Kapalong Mayor Tess Timbol 

The DTI family with national and local officials 

Kapalong Coop chair Atty Rosario R. Dayaday 

 

DavNor News

nainggo