Mas mapalapad na ang pagsabwag sa mga balita ug impormasyon alang sa mga katawhan sa Davao del Norte sanglit sugdan na ang pagtukod sa bag-ong transmitter station project sa PTV Davao del Norte nga nahimutang sa Capitol Compound, Mankilam, Tagum City.

Gipahigayon ang groundbreaking ceremony sa maong transmitter project niadtong Lunes, Hunyo 20, nga gitambongan sa mga personahe sa People's Television Network Inc. (PTNI), PTV Davao, ug dagkong mga opisyal sa Probinsya.

Moabot sa 300-feet ang gitas-on sa four-legged transmitter tower nga gigahinan og dul-an 47-million pesos nga pondo. Gilauman nga moabot sa 1,000 Watts ang kakusgon sa digital broadcast capability niini ug naa sa 70% sa tibuok Probinsya ang kayang aboton sa mas lig-on nga transmitter.

Matod ni PTV General Manager Kat De Castro, ang maong proyekto alang sa tinguha nga mas mapalapad ang coverage sa PTV Davao del Norte dihang padayon kini sa paghatod og komprehensibong impormasyon sa katawhan gikan sa gobyerno ug sa pakigbatok sa fake news.

“Ibig sabihin nito, mas magiging malawak ang reach natin. Kung malawak ang reach ng PTV, mas magkakaroon tayo ng pagkakataon na ma-combat ang fake news… Naiisip ng maraming tao na walang ginagawa ang gobyerno. With the efforts of PTV widening its reach, we’ll be able to combat that. Kailangan nating maiparating sa ating mga kababayan kung ano ang nagagawa ng national government and also the LGUs para sa mga sinasakupan nilang lugar”, pahayag ni De Castro.

Gidayeg sab sa PTV General Manager ang PTV Davao del Norte tungod sa 23 ka impresibo niini nga mga locally-produced programs.

“Alam mo, bilib na bilib ako kasi balita ko more than 20 original programs daw meron ang PTV DavNor. Daig pa ang Main PTV. At marami akong nakuha na mga ideas na pwede rin natin gawin on a national scale galing sa PTV DavNor”, pagdayeg sa PTV general manager.

Kini tungod sab sa paningkamot sa Probinsyal nga Panggamhanan nga gipangunahan ni Governor Edwin “Kuya Gov” Jubahib sa pagsiguro nga mapaabot sa tanang Dabaonon ang importanteng mga impormasyon ug pahibalo, lakip na ang mga kalamboan sa Probinsya.

“We have since been delivering news and producing relevant programs to make our constituents more informed about government policies and programs. This has enabled us to attain significant strides in bringing our government closer to our people, and inspire them to engage in development undertakings”, ingon sa gobernador.

Samtang mipasalig si Davao del Norte 1st District Representative Congressman Pantaleon D. Alvarez, kinsa nagduso aron magahinan og budget ang pagpatukod sa maong proyekto, nga mangita sab siya og paagi aron sunod na pud nga ipatukod ang studio building alang sa PTV Davao del Norte.

Gitarget nga mahuman ang bag-ong transmitter tower sa Oktubre ning tuiga ug makasugod na kini sa pag-broadcast karong Disyembre.

Writer: Gwyn Kelly O. Lobitos
Photos: Jonald Lalas

 

 

 

 

 

 

 

 

 

DavNor News

nainggo