Aron makatabang sa mga nanginahanglan ug masulbad ang problema sa kakulangan sa suplay sa dugo, misalmot ang 2nd Field Artillery Battalion (2FAB) sa pagpahigayon sa 6th Army Artillery Regiment (AAR)-Wide Bloodletting Activity niadtong Hunyo 18, 2022 sa Robinsons Place, Tagum City.
Gipasabot ni ART (GSC) PA Commanding Officer Lt. Col Menner C. Gutierrez kinsa nanguna sa maong aktibidad nga ang bloodletting campaign, sa pakigtambayayong sa Davao Regional Medical Center Blood Bank, nagtumong sa pagtabang sa kulang nga suplay sa dugo sa mga ospital ilabi na niining panahon sa pandemya.
“Itong bloodletting ng AAR nag-start ito 2020 pa during the advent ng pandemic natin… Every quarter ‘to ginagawa ng AAR. So, AAR-wide, ibig sabihin lahat ng battalion nationwide pati sa regiment headquarters nagco-conduct nito simultaneous… So marami-rami na ang natulungan nitong program na ito lalo na nung pandemic. Ngayon, hindi pa tayo tapos sa pandemic. Tuloy-tuloy natin na ginagawa ito para makatulong tayo sa mga immediate community pati na rin sa mga kasundalohan natin na nangangailangan ng safe na dugo”, sulti sa commanding officer.
Ingon sab, gisuportahan sa maong inisyatibo ang Republic Act (RA) 7719, o mas nailhan nga National Blood Services Act, nga nagtumong sa paghatag og luwas nga dugo alang sa mga nanginahanglan.
Sa hiniusang intensyon nga makatabang sa mga nanginahanglan og dugo, nagtinambayayongay ang lain-laing stakeholders sama sa Probinsyal nga Panggamhanan sa Davao Del Norte nga gipangunahan ni Governor Edwin "Kuya Gov" I. Jubahib, Opisina ni Senador Ronald “Bato” Dela Rosa, LGU-Tagum, Robinsons Place Tagum, ug uban pang pribadong organisasyon nga nahimong kaabag sa bloodletting activity pinaagi sa pag-sponsor sa lokasyon, pasilidad, og pagkaon alang sa mga donors, medical practitioners, ug support personnel.
Dunay kinatibuk-ang 120 ka bags sa dugo ang nakolekta sa yunit gumikan sa 159 ka rehistradong donors gikan sa organic personnel sa 2FAB, Philippine National Police (PNP), Bureau of Fire Protection (BFP), reservists ubos sa 1102nd Community Defense Center, Tagum Doctors College, Arriesgado College, University of Mindanao, Tagum City Department of Education, civilian walk-ins ug supported units nga gibantayan sa 10th Infantry Division.
“Nag-participate mi sa ingani na butang kay as a future public officer puhon, kailangan pud nato mutabang sa atong uban nga katawhan pud nga nanginahangla’g dugo po”, sulti ni Justine Joseph Jorolan, Criminology student sa University of Mindanao Tagum dihang gipangutana nganong miapil siya sa bloodletting activity.
Samtang si Mindanao Peace Council Sergeant Vince Molejon kinsa regular nga nagadonar og dugo, nagtan-aw sa kalihokan isip oportunidad sa pagtabang ngadto sa mga nanginahanglan.
“It’s an act of charity. Kay bloodletting, blood donation, maka-help man ni to extend someone’s life who’s maybe in the brink of disaster… If we do this, murag gaan sa loob ba na we never know who will receive the blood, pero we know nga for certainty, naa gyuy maka-benefit”, pahayag ni Molejon.
Ang 6th AAR-Wide Bloodletting Activity maoy usa sa mga major activities sa Army Artillery Regiment kalabot sa ika-15 nga anibersaryo niini.
