MGA adlaw sa dili pa mokanaug ingong National Security Adviser, imbitado gayod si kasamtangang NTF-ELCAC Vice Chairperson Secretary Hermogenes Esperon, umaabot Department of National Defense Secretary General Jose Faustino, Jr. ug Davao del Norte Gobernador Edwin “Kuya Gov” Jubahib sa Eastern Mindanao Command (EastMinCom) aron maipakita ang dagkong kalamposan sa pagpatuman sa kampanya kontra terorismo sa mga lugar nga nasakopan niini.
Gipangunahan ni NSA Esperon ang pagtan-aw sa mga “exhibits” kumpiskadong armas kauban si General Faustino, Kuya Gov, 10th ID Commanding General Nolasco Mempin ug ubang opisyales sa Army.
Giila sa kasundalohan ang dakong kontribusyon ni Kuya Gov sa padayong pagpatuman sa EO 70 ni Pangulong Rodrigo Duterte nga National Task Force-Ending Local Communist Armed Conflict gumikan sa sobra 3,000 ka mga NPAs ug mga membrong Milisya ng Bayan nga misurender.
Bisan sa wala pa mahimong Gobernador sa Davao del Norte, aktibo na si Kuya Gov sa kampanya kontra terorista dihang napa-surender niini ang dugay nang wanted sa balaod nga si Datu Guibang Apoga ug mga kaubanan niadtong 2018. Ang mga IPs nga nahimong “bakwit” sa UCCP-Haran Davao City napabalik sab ni Kuya Gov sa ilang mga lugar sa Talaingod ug Gupitan.
Wala sab pasagdi ang mga kanhi rebelde nga mibalik sa gobyerno. Uban sa pondo sa mga nasyonal ahensya, sobra na 500 ka mga balay ang napatukod sa Gobernador alang sa mga IPs nga mao ang pinaka-sayon nga ma-recruit sa mga NPAs.
Niadtong Hunyo 13, pormal na nga gi-deklarang “Insurgency Free” ang tibuok Davao del Norte.
Gawas sa DavNor, deklarado na sab nga Insurgency Free ang Davao City, mga probinsya sa Davao Oriental, Davao de Oro ug Davao del Sur sa Rehiyon XI.
*****************///
