HUMAN sa duha ka tuig nga walay kalihokan, pormal nga giabrihan ang KADAGAYAAN Festival 2022 Lunes, Hunyo 27.
Gipangunahan ni DavNor Gobernador Edwin “Kuya Gov” Jubahib ang ribbon-cutting timaan sab sa pagsugod sa ika-55 nga anibersaryo sa probinsya sa Davao del Norte pagka Hulyo 1.
“Human sa duha ka tuig nga wala ta’y face-to face nga panagtapok, makalipay nga kita karon nagkatigom para isaulog ang KADAGAYAAN Festival 2022; medyo maayo na ang sitwasyon karon. Gikan didto sa cutting of ribbon mibaktas ko kuyog sa mga department heads ug nakita nato ang mga displey nga nindot kaayo ang mga produkto sa matag LGU. Kining tanan resulta gumikan sa atong pagtinabangay, paningkamot sa tanan,” matod ni Kuya Gov nga nag-ila sa tanang lokal opisyales sa mga LGUs, city ug municipal agriculturists ingon man ang PNP ug Philippine Army.
Gipahibalo sab sa gobernador nga “insurgency free and ready for development province” na ang DavNor gumikan sa pagtinabangay sa tanang government officials lakip na ang mga partners national agencies.
Sa iyang mensahe mapasalamaton kaayo si Kuya Gov kang Guest Speaker Director IV Dionisio Alvindia gikan sa Philippine Center for Postharvest Development and Mechanization (PhilMech) nga girepresentahan ni Engr. Rey Adarna nga “bitbit” niini ang gasa kantidad P55 Milyones post-harvest facilities sa pagpanguma og humay. (Ang PhilMech nakahatag na sa DavNor og sobra P250Milyones kantidad nga mga makinaryas sa miaging duha ka tuig.)
Mapasalamaton sab ang gobernador sa kalamposan sa flagship food-sufficiency program nga KAwsa sa AGrikulturA ug PAnginabuhian sa barangaY kun KAAGAPAY uban ang panghinaut nga padayon kining suportahan sa Sangguniang Panlalawigan sa iyang ikaduhang termino.
Ang KAAGAPAY nakatabang ilabina sa mga marginal farmers pinaagi’g pagpananom of gulay, pagbuhi’g manok nga paliton ra sab pagbalik sa probinsya panahon sa COVID-19 pandemya.
Apan nagpahimangno ang gobernador nga nag-atubang na sab og laing krisis ang katawhan nga labaw pa sa COVID-19. Nagmahal ang mga produkto sa petrolyo tungod sab sa gyera sa Russia kontra Ukraine hinungdan nga nag-awhag nga kinahanglan gyod nga mananom aron pagseguro sa pangunang panginahanglan, ang pagkaon.
“Busa mga igsoon ko ang tanang tao pwede pa’g walay kwarta (pero) pwede pa mo-survive ang matag usa. Apan kung wala na’y pagkaon, dili gyod mo-survive especially mga bata. Unsay hagit nato ani nga problema? Unsay atong himoon? Unsay atong kaya? Hagit nato sa tanang pamilya sa Davao del Norte, government officials, elected officials, ang hagit sa matag usa, mananom tang tanan. Mananom ta sa atong tugkaran, dili nato sayangon ang bakanteng yuta, magkugi ta nga mananom kay dili nato matag-an ang sitwasyon, ang panahon dili nato kontrol unsa ma’y moabot nga problema,” paghagit ni Kuya Gov sa tanan.
Ang KADAGAYAAN Festival 2022 giapilan sa 11 ka mga LGUs nga nag-displey sa ilang mga produkto uban ang grupo sa mga commodity producers ug manufacturers diha sulod sa DavNor Sports & Tourism Complex hangtod Hulyo 1, 2022.
****************///
