"This is a clear manifestation of faith in God, of trust in God.”

Kini ang pahayag ni Bishop Emeritus of Tagum Diocese Wilfredo D. Manlapaz diin iyang gidayeg ang inisyatibo ni Governor Edwin "Kuya Gov" I. Jubahib ug sa Probinsya sa Davao del Norte nga sugdan ang oathtaking ceremony alang sa newly-elected provincial officials pinaagi’g usa ka thanksgiving mass nga gipahigayon kaganihang alas 8 sa buntag sa DavNor Gym.

Matod ni Bishop Manlapaz, kinsa midumala sa maong misa sa pagpasalamat, kini usa ka timailhan nga ang mga bag-ong pinili ug mulingkoray nga mga opisyal sa Davao del Norte wala lang gaangkon sa pagsalig sa katawhan, apan ingon man sab sa panalangin ug giya gikan sa Diyos.

"Kining atong pagasaksihan karon—ang oathtaking preceded by the sacrament of the Eucharist… Kini pagpadayag sa pagtuo sa gobernador… nga aron magmalampuson ang serbisyo—ang administrasyon, importante dili lamang ang tabang sa katawhan. Labaw na importante ang panalangin sa Diyos," sulti sa Bishop Emeritus.

Ang misa gitambongan mismo ni Governor Jubahib, 1st District Representative Congressman Pantaleon D. Alvarez, mga Board Members sa Sangguniang Panlalawigan, municipal and city mayors, uban pang dagkong mga opisyal sa probinsya, munisipyo, ug barangay sa Davao del Norte, mga personahe sa Kapitolyo, lainlaing ahensya ug sektor sa gobyerno, ug mga pribadong organisasyon.

Ang gipahitabong thanksgiving mass alang sab sa pagpasalamat sa abundang gasa sa agrikultura ug kinaiyahan sa Davao del Norte nga kabahin gihapon sa pagsaulog sa Kadayawan Festival 2022.