HUMAN manumpa isip re-elected governor sa Davao del Norte sa ikaduhang termino, nanawagan si Governor Edwin “Kuya Gov” Jubahib ngadto sa tanang midaug nga ipadaplin na ang politika atol sa mass oathtaking didto sa DavNor Gym Martes, Hunyo 28, 2022.

Kini aron daling mahatod ang angayan nga mga serbisyo ngadto sa katawhang Dabaonon.

“Alang sa tanang newly elected officials, from provincial down to municipal level down to the barangays: i-set aside na nato ang politika. Humana ang piliay, gipili ta sa katawhan tungod kay aduna sila’y pagsalig kanato. Kung dili ta magka-unite alang sa maayong programa ug serbisyo nga dapat nato ihatod sa katawhan sa probinsya sa Davao del Norte, ang atong kadaugan mahimong useless. Kay ngano man? Ang babag sa kalamboan, kung dili kita magkahiusa,” matod ni Kuya Gov ngadto sa mga midaug uban ang pag-awhag sa mingdaug kaatbang partido nga mga kandidato.

“Ako isip inyong Kuya Gov sa probinsya, ako kamong awhagon: Kung maayo ang akong programa, ayaw ko ninyo babagi. Ayaw pod ninyo i-delay, kay kung pila ka adlaw nga pag-delay, mao sab na kadugay ang pagpaabot sa katawhan sa Davao del Norte sa maayong serbisyo gikan sa mga elected officials. Ang akong hangyo kaninyo, magtinabangay ta alang sa kaayohan sa katawhan sa probinsya; sa kaayohan sa matag pamilya, kaayohan sa matag lungsod ug syudad, ug kaayohan sa tibuok probinsya,” pag-awhag sa “gobernador ng masa.”

Sa inaugural address sa gobernador, balik-balik nga gipasalamatan ang tanang provincial, local ug national agencies ilabina ang AFP ug PNP sa pagkahimo sa Davao del Norte ingong “insurgency free” province nga padayong nag-awhag sa tanang Dabaonon sa padayong panaghiusa aron pagsulbad sa hagit nga mga problema.

“Mga kaigsoonan ko, mga elected officials, our role is to continue a decent public service for the people. Ug mao ni ang hagit nato ug hagit sa tanang midaug nga magtinabangay ta nga masulbad ang mga problema, ang mga basic nga problema sa atong probinsya. . . Hangyoon ko kamong tanan nga magkahiusa ta, magkuyog ta. Kay dili kaya sa government officials, dili kaya sa Philippine Army, dili kaya sa Philippine National Police ug mga national agencies kundili ang taga, taga Davao del Norte, matag pamilya, ang tanang indibiduwal, aduna po’y inyong obligasyon. Kinahanglan nga motuman pod mo sa atong gobyerno sa mga patakaran. Ug maningkamot pod mo para sa inyong matag pamilya.”

Ang oathtaking ni Kuya Gov gitambongan gyod sa iyang 84-anyos nga Papa ug 85-anyos nga Mama kauban sa iyang mga anak.

Sa mass oathtaking, nanumpa sab si re-elected First District Congressman Pantaleon “Bebot” Alvarez, midaug nga mga board members, midaug nga Tagum City officials ingon man ang mga midaug nga kandidato sa lungsod sa San Isidro (Sawata).

***************///