Atol sa pagselebrar sa ika-55 Araw ng Davao del Norte, dili lamang mga aktibidades bahin sa abundang ani sa probinsya, beauty pageant, ug mga kalingawan alang sa pisikal nga aspeto sa mga Dabaonon ang gipasiugda apan gigahinan sab og programa ang mga kabatan-onan aron masigurong himsog ug maayo ilang panghuna-huna.
Ang administrasyon ni Gobernador Edwin “Kuya Gov” Jubahib pinaagi sa Provincial Sports and Youth Development Office (PSYDO) nag-imbita sa UNLAD Kabataan ug Pag-asa Youth Association of the Philippines (PYAP) sa FIT MIND Mental Health forum nga naglayong sulbaron ang mga negatibong sikolohikal na impak sa duha ka tuig na pandemya ngadto sa mga batan-on.
Sa pagsaysay ni PSYDO Department Head Giovanni Gulanes, nahimo gyud nga “vulnerable” (huyang) ang mga kabataan sa mental illness sama sa depresyon ug anxiety panahon sa pandemya tungod sa pag-undang sa mga face-to-face na kalihokan alang sa ilaha.
“The youth kay very vulnerable especially sa pandemic kasi ang mga youth man gud very mobile, laagan kaayo gusto og kanang action, but during pandemic na halt na tanan so di kalikayan nga aduna gyud psychological impact ana that led them to depression and other things so gitan-aw sa probinsya sa Davao del Norte, ingon ni Kuya Gov, i-address na nga concerns so ang PSYDO nagpasiugda niini,” sulti ni Gulanes.
Giimbita isip guest speakers sa forum ang Hiraya-Diwa team, usa ka organisasyon nga nagapaambit og sikolohikal nga serbisyo sama sa counseling, psychological testing, industrial ug organizational consultation, na mao sila Febby Kirstin Ibita, usa ka registered pharmacist (RPh) ug licensed professional teacher (LPT), ug si Klent Rodni Delima, usa ka registered psychologist (RPsy).
Pinaagi sa ilang kaalam ug kahanas, ilahang gipaabot ang mga topikong naglangkob sa Anxiety Management ug Suicide Awareness and Prevention nga dako’g kalabutan sa pagsiguro na matabangan ang mga kabataan sa tanang aspeto sa ilahang kinabuhi.
Dugang pa ni PSYDO Head Gulanes, ang mga programa ni Kuya Gov sa mga kabataan nakasentro sa paghatod og holistic approach aron mahataga’g pagtagad dili lamang ang pisikal apan apil na sab niini ang sikolohikal o mental na aspeto.
“Ang kay Kuya Gov man gud it is through PSYDO na i-strengthen ang mga kabatan-onan. When we say strengthen, it means holistic naa kay physical aspect which is tournament, naa kay arts, naa kay other aspect and this part is the psychological aspect so di nato kalimtan ang mental aspect sa mga kabatan-onan which is equally important,” pag explikar ni Gulanes.
Nahimugso sab ning FIT MIND forum human nakita sa tala sa Provincial Health Office (PHO) nga nitaas ang suicide rate sa mga kabatan-onan sa Davao del Norte.
“According to PHO's data, naga taas ang suicidal rate sa youth sa Davnor. If we could save one life through this event, we would be very happy. Kamo pud, maybe you could save the life of your friend, brother or sister. This is how important this event is,” pagtapos ni Gulanes.
