KAY SILA IMPORTANTE, gipasidunggan sa probinsyal nga administrasyon ni Gobernador Edwin “Kuya Gov” Jubahib ang mga mag-uuma ug mga Agricultural Extension Workers (AEWs) sa ika-55 nga anibersaryo sa Araw ng Davao del Norte.
“Dako ang kagustohan sa provincial governor nga unta makighinabi sa tanang mga farmers ug sa mga Agricultural Extension Workers kay kini man gung duha ang pinaka-major stakeholders sa real agricultural development. As long as ang tao nagkinahangla’g pagkaon kinahanglan nga naa po’y farmers nga mo-produce ug pagkaon. Unya ang mga Agricultural Extension Workers, kini sila ang motabang sa mga mag-uuma nga makakat-on og mga bag-ong pamaagi sa panguma aron motaas ang produksyon. Nia ta dire ug ang mga AEWs kay gusto ni Kuya Gov nga kamo pasidunggan,” pasabot ni PAGRO Assistant department head Engr. Leonilo Patayon labot sa wala pag-abot sa gobernador gumikan sa nagdungan tulo ka project groundbreaking sa New Corella ug Panabo City.
Gawas sa pagpasidungog kanila, naghulat sab ang daghang papremyo nga “walay mopauli nga luhaan” sa pagbalik sa KADAGAYAAN festival human sa duha ka tuig walay face-to-face.
“Akong ipaabot ang kinasingkasing pagtimbaya sa atong mga mag-uuma ug mga lumilihok sa agrikultura. Kamo ang mga bayani nga malahutayon nga nakigbisog sa matag adlaw alang sa maayong abot ug aron dunay makaon ang inyong pamilya. Ang pagpanguma maoy usa sa pinakalisod nga trabaho kay wala pa migimaw ang adlaw sa kabuntagon anaa na kamo nagtikaw-tikaw sa inyong kaumahan. Wala kamo’y kakapoy sa pag-ugmad bisan pa sa kainit sa adlaw. Tinuod gayod ang kanta “magtanim ay di biro, maghapong nakayuko,” matod sa mensahe ni Kuya Gov nga personal naka-eksperyensya sa maong kahago ug nakasinati’g kalisod sa kinabuhi ingong mag-uuma.
Sa hulga sa COVID-19 pandemya, gilunsad sab ni Gobernador Jubahib ang food-sufficiency program nga KAwsa sa AGrikulturA ug PAnginabuhian sa barangaY kun KAAGAPAY aron masagubang ang kanihit sa pagkaon diin ang mga mag-uuma mao ang adunay pinakadakong papel nga gidula.
“Kamong mga mag-uuma ang usa sa inspirasyon sa maong programa, kay nakita namo nga bisan unsa pa man ang lakat sa panahon sa pagpanguma walay magutom kay kamo nagtanom, aduna kita’y anihon, aduna kita’y makaon ug tuod man napamatud-an nato kini sulod sa tulo ka tuig,” nagpadayon ang mensahe nga gipaabot pinaagi ni Executive Assistant Wendell de Ramos.
Nalingaw gyod pag-ayo ang mga mag-uuma ug mga AEWs gikan sa 11 ka LGUs. Ang mga pa-contest nga “pinaka” naghatag ug P3K, P2K ug P1K alang sa first, second ug third prizes. Ang wala midaug tanan adunay consolation prizes nga cash. Nagpili sab og 55 ka “Best KAAGAPAY attire” nga tig P550 matag usa, twisted basketball ug volleyball nga mga padula lakip na ang “impromptu” videoke nga nagpatungha’g panghugyaw ug lanog nga pagpangatawa.
*****************///
