Gipresentar ni Governor Edwin “Kuya Gov” Jubahib sa mga miyembro sa Sangguniang Panlalawigan (SP) ang iyang gipakusgan nga estratehiya aron ipadayon ang kabag-ohan ug lig-onon pag-ayo ang mga programa alang sa tinuod nga kalamboan.

Atul sa ‘Inaugural Session’ sa SP ganinang buntag, gilatid sa gobernador ang mga programa ug proyekto alang sa iyang ika-duha nga termino gikan tuig 2022 hangtud 2025, pinaagi sa pagpalapad sa iyang KUYA GOV development agenda.

Dugang sa mga programa nga pagatutukan ni Kuya Gov ang inclusive scholarship, diin pwede mo-apply ang estudyante nga dunay grado nga 75; repair ug pagdugang sa mga sports facilities; pag-upgrade sa mga provincial hospitals ngadto sa level 2; pagpakusog sa zero-billing program; pagtukod sa mga infirmary hospitals ug dialysis centers; dugang nga hinabang alang mga mag-uuma; pagpalapad sa irrigation systems; pagtukod sa mga processing plants, grain silos, post-harvest facilities ug trading post; peace-building programs; ug daghan pang uban.

Sa iyang unang termino, gipatuman ni Jubahib ang 7-point strategy, ingon nga Knowledge management, education and sports; Universal health and social services; Yield growth in agriculture and environmental sustainability; Adequate infrastructure and facilities; Greater livelihood and income opportunities; Operational peace and development framework; and, Broad-based economic growth and investments.

Aron labaw nga malig-on ang paghatud sa mga serbisyo, iya karon gidugangan ang maong agenda aron mahimo na kining KUYA GOB NG MASA development agenda.

“I see the need to expand the full potential of our public services by adding additional components to our existing development agenda… to put a wider perspective to our pro-change, pro-poor government (Nakita nako ang pagkinahanglan aron padakuon ang atong serbisyo publiko pinaagi sa pagdugang sa naglungtad nga agenda… aron palapdan ang panlantaw sa atong panggobyerno nga para sa kausaban ug dapig sa pobre),” sulti niya.

Apil na karon sa bag-ong 13-point development agenda ni Kuya Gov ang mga ‘component’ nga Nurturing society, Gender-responsive development, Multimodal utility network, Access to Financial Services and Financial Inclusion, Sustainable tourism, ug Absorptive capacity development.

Sa component nga Nurturing Society, tumong sa probinsya ang pagpanday sa luwas ug maamumahon nga komunidad, samtang milangkob sa Gender-Responsive Development ang patas nga partisipasyon ug proteksiyon sa mga kababainhan, ug kabataan ug apil na usab ang kaayuhan sa LGBTQ+ community.

Target sab sa Multimodal Utility Network component ang pag-uswag sa mga utility services ug interkoneksyon niini, sama sa kuryente, tubig, telecommunication, internet services, ug uban pa, samtang ubos sa Access to Financial Services and Financial Inclusion mohatag ang probinsiya og zero-interest loans alang mga mag-uuma, mangingisda, informal sector, ug uban pang marginalized sectors.

Sa Sustainable Tourism, pakusgon sa probinsiya ang programang turismo aron mahimong katimbang sa pag-uswag sa ekonomiya, samtang palig-onon ni Kuya Gov ang kapasidad sa mga LGUs sa pagpatuman sa daghang mga proyekto ilawom sa Absorptive Capacity development component.

Hangyo ni Kuya Gov sa bag-ong set sa mga miyembro sa SP, nga gipangunahan ni Vice Governor De Carlo Uy, nga iuyon ang ilang legislative agenda, aron mahimo ang hiniusang Executive-Legislative Agenda (ELA) sa probinsiya.

“I call today for a renewed spirit of unity, a new spirit of love and cooperation, setting aside our political color and differences. With a deep sense of responsibility, we ought to offer what we can give to serve the best interest of our people,” panapos sa gobernador. (Nobags)

 

 

 

 

 

DavNor News