Sugdan na ang pagtukod sa bag-ong Outpatient Department (OPD) building sa Davao del Norte District Hospital - Carmen Zone nga dunay tulo (3) ka andana aron masulosyonan ang kaguot ug guba na nga karaang all-in-one OPD building sa maong ospital.

Mismong si Gobernador Edwin “Kuya Gov” Jubahib ang nanguna sa groundbreaking ceremony kagahapong adlawa dungan sa pagbisita sa district hospital aron sa pagtan-aw sa kahimtang niini ug pagsuta sa uban pa niining panginahanglan.

Nasungkit sa gobernador ang dul-an sa P10 milyon nga pondo alang sa phase 1 contruction sa maong gambalay nga gipaagi sa Department of Public Works and Highways diin gilaumang mahuman sulod sa 120 ka adlaw ug makasugod sa pag-operate samtang magapadayon ang pagtiwas sa phase 2 construction niini diin dugang P20 milyon ang igahin ni Kuya Gov. Iyang gipasabot nga dili lang putlon ang mga dagkong punoan sa kahoy nga makahatag landong ug pugong sa epekto sa climate change sa kinaiyahan.

𝘕𝘢𝘱𝘢𝘭𝘢𝘮𝘣𝘰 𝘯𝘨𝘢 𝘗𝘢𝘴𝘪𝘭𝘪𝘥𝘢𝘥 𝘶𝘨 𝘚𝘦𝘳𝘣𝘪𝘴𝘺𝘰

Sa unang adlaw pa lang sa iyang paglingkod, nag-una sa flagship program ni Kuya Gov ang health services tungod sa iyang pagdeklara og Zero-billing sa tanang pampublikong ospital sa probinsya. Ug aron molungtad pa’g dugay, giawhag niya ang mga local executives nga motabang sa pagbutang og pondo.

Gihanduraw usab ni Kuya Gov ang kanhing luoy nga kahimtang sa ospital. Kalapokan ang palibot niini diin iyang gipatambakan og yuta ug labayanan og basura ang luna diin gipalimyohan ug gitukoran na og bilding karon sa luyong bahin sa compound.

Giutro usab niya ang sistema sauna nga mangayo pa’g per diem ang driver sa ambulansya ug bayad pang-diesel nga sweldado na man unta ang mga personahe sa probinsya lakip ang mga driver sa mga district hospitals ug duna na po’y gigahin nga budget alang sa pangtubil gikan sa capitolio.

Kahinumdoman, sa pagsupang sa pandemya, gipatukod usab sa gobernador ang 1,200 ka airconditioned covid-19 isolation rooms nga dunay libreng WiFi alang sa pag-abiba sa napuno nga isolation facility sa Davao Regional Medical Center. Namontar usab ang DavNor Pharmacy aron makabenepisyo sa barato nga tambal ang mga gakalisud nga pasyente.

Sa kasamtangan, padayon ang konstruksyon sa Provincial Temporary Treatment Facility ug Administrative building sa Carmen Hospital nga gilaumang mahuman karong tuiga.

𝘛𝘢𝘳𝘶𝘯𝘨𝘰𝘯 𝘗𝘢𝘨-𝘢𝘵𝘪𝘮𝘢𝘯

Nagpasidaan ang provincial chief executive ngadto sa mga empleyado ug staff sa maong ospital nga tarungon ang ilang pagpanarbaho ug pag-atiman sa mga pasyente ilabina na ang pagbaton og taas nga pailob sanglit dili siya magpanuko sa pagtangtang sa bisan kinsa nga mapamatud-ang nagkuwang sa paghatag sa tinuoray nga serbisyo sa katawhan.

“𝘗𝘢𝘨-𝘢𝘣𝘰𝘵 𝘴𝘢 𝘱𝘢𝘴𝘺𝘦𝘯𝘵𝘦 𝘱𝘢𝘴𝘢𝘨𝘥𝘢𝘯 𝘯𝘪𝘯𝘺𝘰𝘯𝘨 𝘮𝘢𝘨𝘵𝘢𝘯𝘨𝘢 𝘥𝘪𝘩𝘢. 𝘜𝘯𝘺𝘢 𝘮𝘢𝘮𝘢𝘵𝘢𝘺 𝘯𝘢 𝘭𝘢𝘯𝘨 𝘯𝘢𝘯𝘨 𝘱𝘢𝘴𝘺𝘦𝘯𝘵𝘦. 𝘒𝘢𝘯𝘢, 𝘬𝘢𝘵𝘰𝘯𝘨 𝘯𝘢𝘩𝘪𝘵𝘢𝘣𝘰 𝘥𝘪𝘳𝘪, 𝘥𝘪 𝘣𝘢? 𝘗𝘪𝘭𝘢 𝘯𝘢 𝘬𝘢 𝘩𝘪𝘵𝘢𝘣𝘰 𝘥𝘪𝘳𝘪 𝘯𝘨𝘢 𝘨𝘪𝘵𝘢𝘯𝘨𝘨𝘢𝘭 𝘯𝘢𝘬𝘰. 𝘍𝘪𝘭𝘦-𝘢𝘯 𝘱𝘢 𝘨𝘺𝘶𝘥 𝘯𝘢𝘬𝘰’𝘨 𝘬𝘢𝘴𝘰. 𝘋𝘪 𝘭𝘢𝘯𝘨 𝘵𝘢𝘯𝘨𝘨𝘢𝘭. 𝘚𝘶𝘭𝘵𝘪𝘩𝘢𝘯 𝘮𝘰 𝘯𝘢𝘬𝘰, 𝘴𝘢𝘬𝘪𝘵 𝘯𝘢 𝘱𝘢𝘳𝘢 𝘴𝘢 𝘢𝘬𝘰𝘢 𝘣𝘪𝘴𝘢’𝘨 𝘥𝘪𝘭𝘪 𝘯𝘢𝘬𝘰 𝘯𝘢 𝘬𝘢𝘱𝘢𝘮𝘪𝘭𝘺𝘢, 𝘱𝘦𝘳𝘰 𝘴𝘢𝘬𝘪𝘵 𝘯𝘢 𝘱𝘢𝘳𝘢 𝘴𝘢 𝘢𝘬𝘰𝘢. 𝘒𝘢𝘺 𝘯𝘨𝘢𝘯𝘰 𝘮𝘢𝘯? 𝘐𝘣𝘶𝘵𝘢𝘯𝘨 𝘱𝘶𝘥 𝘥𝘢𝘸 𝘪𝘯𝘺𝘰𝘯𝘨 𝘴𝘢𝘳𝘪𝘭𝘪. 𝘒𝘶𝘯𝘨 𝘬𝘢𝘮𝘰 𝘢𝘯𝘨 𝘯𝘢𝘣𝘶𝘵𝘢𝘯𝘨 𝘴𝘢 𝘴𝘪𝘵𝘸𝘢𝘴𝘺𝘰𝘯 𝘴𝘢 𝘶𝘴𝘢 𝘬𝘢 𝘱𝘢𝘴𝘺𝘦𝘯𝘵𝘦 𝘯𝘨𝘢 𝘯𝘢𝘨𝘥𝘢𝘭𝘪-𝘥𝘢𝘭𝘪 𝘰𝘨 𝘢𝘥𝘵𝘰 𝘴𝘢 𝘰𝘴𝘱𝘪𝘵𝘢𝘭, 𝘯𝘢𝘯𝘪𝘯𝘨𝘬𝘢𝘮𝘰𝘵 𝘴𝘢 𝘰𝘴𝘱𝘪𝘵𝘢𝘭 𝘰𝘨 𝘢𝘣𝘰𝘵 𝘱𝘢𝘳𝘢 𝘮𝘢𝘥𝘶𝘨𝘵𝘰𝘯𝘨𝘢𝘯 𝘢𝘯𝘨 𝘬𝘪𝘯𝘢𝘣𝘶𝘩𝘪 𝘴𝘢 𝘪𝘺𝘢𝘯𝘨 𝘱𝘢𝘴𝘺𝘦𝘯𝘵𝘦. 𝘗𝘢𝘨𝘩𝘶𝘮𝘢𝘯 𝘪𝘯𝘺𝘰𝘯𝘨 𝘳𝘢’𝘯𝘨 𝘱𝘢𝘭𝘪𝘯𝘨𝘬𝘶𝘳𝘰𝘯 𝘥𝘪𝘩𝘢 𝘴𝘢 𝘣𝘢𝘯𝘨𝘬𝘰 𝘴𝘢 𝘰𝘴𝘱𝘪𝘵𝘢𝘭. 𝘞𝘢 𝘨𝘢𝘯𝘪 𝘯𝘪𝘯𝘺𝘰 𝘯𝘢𝘢𝘵𝘪𝘮𝘢𝘯, 𝘮𝘢𝘮𝘢𝘵𝘢𝘺 𝘯𝘢 𝘭𝘢𝘯𝘨. 𝘏𝘢𝘭𝘢! 𝘒𝘶𝘯𝘨 𝘬𝘢𝘮𝘰 𝘢𝘯𝘨 𝘬𝘢𝘱𝘢𝘮𝘪𝘭𝘺𝘢 𝘢𝘯𝘢, 𝘨𝘢𝘯𝘢𝘩𝘢𝘯 𝘮𝘰, 𝘥𝘪𝘭𝘪? 𝘋𝘪𝘭𝘪, 𝘥𝘪 𝘣𝘢?,” emosyonal nga pagpahimangno ni Kuya Gov.

Paningkamotan sa administrasyong Jubahib nga himoong level 2, dili lang ang Carmen Zone, lakip na ang IGaCos ug Kapalong Zone subay sa K.U.Y.A. G.O.B. N.G. M.A.S.A. development agenda sa letrang U - Universal health and social services sa tumong nga padayong mapalambo ang serbisyong panlawas sa probinsya.

Pinaagi sa pagpamalit og dugang mga ekipo sama sa dialysis machine, MRI, CT scanner ug uban pa, mas mapagaan ang bayronon sa pagpaospital ug mapaduol sa katawhan ang serbisyong medikal. Lakip na usab ang planong pagpatukod sa ubang LGUs og infirmary hospitals sama sa gapadayong konstruksyon sa lungsod sa Panabo ug Sto. Tomas. Pakusgon usab ang mga barangay health centers ug birthing facilities.

Nagpakita sa ilang suporta sila DDNDH-Carmen Zone OIC-Chief of Hospital Ruchille S. Arrocena, DPWH Representative Engr. Ivi May C. Bete, LGU Carmen Representative Dr. Dominic R. Basalo, ug PEEDO Representative Supervising Administrative Officer Sergio G. Bardos.