Nagpahigayon ang Probinsyal nga Panggamhanan sa Davao del Norte og Salamat Mabuhay Program: A tribute to the Retirees, niadtong Hulyo 7, 2022, sa Narra Hall, Molave Hotel, Tagum City.

16 ka mga retirado ug tulo (3) ka mga posthumous nga girepresentahan sa ilang mga kabanay gihatagan og service plaque, service ring nga dunay logo sa Davao del Norte ug mga memorabilla. Nakadawat usab sila og mga bulak, balon og uban pang pahalipay sa ilang pamilya.

Ang mga retiradong mga mamumuo sa capitolio, naggikan sa nagkadaiyang mga departamento, sama sa Provincial General Services Office, Provincial Engineering Office, Provincial Agriculture Office ug uban pa.

Niduyog sa maong okasyon ang mga department heads sa panguna ni Provincial Administrator Engr. Josie Jean Rabanoz ug ni Provincial Human Resources & Management Officer Edwin A. Palero kinsa maoy nagpasiugda sa maong programa.

Mensahe sa PHRMO head ngadto sa mga retirees, nga wala sila nag-retire kundili nag-ilis lang sila’g “tire” o “ligid”, alang sa laing panerbisyo sa katilingban, ug mas daghang oras alang sa pamilya. Gipaabot usab ni Palero ang iyang kinasing-kasing nga pasalamat gumikan sa ilang nahimong kontribusyon sa capitolio ug sa mga Dabaonon.

Samtang, gitagaan og gibug-aton ni Engr. Rabanoz ang taas nga mga katuigan nga gigahin sa mga retirees alang sa pagserbisyo sa nasud og sa pronbinsya, nga dili gyud makalimtan nga kabahin sila kanunay sa mga kalamboan nga naangkon sa DavNor niining mga tuiga.

Nagpaabot sab si Gobernador Edwin “Kuya Gob” I. Jubahib sa iyang dakong pasalamat sa tim-os nga suporta sa mga retirees sa iyang administrasyon, nga nahimong katambayayong alang sa dakong kausaban sa kinabuhi sa mga Dabaonon.

Matud niya, nga iyang gibubo ang daghang mga programa, proyekto ug serbisyo, labi na sa mga sector nga sa dugay nang panahon napasagdan sa gobyerno. Tungod sa iyang pagpaningkamot, bisan pa sa daghang mga hagit, nabati na karon sa katawhan ang dakong kausaban sa mas malinawon ug malambuon nga Davao del Norte.

Sa laing bahin, sumala pa sa usa ka retirado nga si Marilou N. Runas, ang kanhing Senior Agriculturist sa Provincial Agriculturist Office, nga nagserbisyo sa maong buhatan sulod sa kapin 42 ka tuig, nga daghan kaayong mga pagsulay ang ilang nasinati apan gumikan sa pagtinabangay nabuntog nila ang tanan. Nagpadayag siya sa iyang dakong kalipay sanglit mahatagan na niya og dakong panahon ang iyang pamilya og labi na gyud ang iyang kaugalingon. Dugang niya nga gikinahanglan ang passion, commitment ug pasensya aron nga molahutay sa pagpanarbaho.

Nagpadayag usab sa iyang dakong pasalamat ngadto kang Kuya Gov si Alex G. Namalata, kanhing Administrative Aide 1, nga nadistino sa Provincial Engineering Office. Nagpangidaron kini’g 48 anyos, kinsa ni-avail sa early retirement program gumikan sa gihambin niining balatian, hinungdan sa lisud niyang paglihok ug bisan sa iyang pag-istorya.

Pagsaysay sa anak ni Namalata, sa maglisud na iyang amahan sa pag-istorya, ug sa dihang naadmit na kini sa Davao Regional Medical Center gumikan sa pagka-stroke, wala kini gipasagdan ni Kuya Gov, gani isa kini sa liboan ka mga katawhan nga nakabenepisyo sa zero billing sa gobernador gawas sa gihatag nga dugang financial assistance.

Mapasalamaton usab ang mga kabanay ni Alex, gumikan kay naapil siya sa nahatagan og pasidungog sa probinsyal nga panggamhanan.

Written: Nestor Mata, Jr.
Photos: Kier Martinez, DavNor PHRMO
JC Balante

 

 

 

DavNor News