Kulba sagol hinam ang nabati sa siyam ka mga benepisyaryo sa dihang gidawat nila ang Livelihood Starter Kit gikan sa Department of Labor and Employment (DOLE) XI - Davao del Norte nga nagkantidad og 20,000 pesos kada usa, didto sa Provincial Governor’s Office, Mankilam, Tagum City, Hulyo 11.

Sama sa usa ka amahan sa pamilya, gitambagan ni Kuya Gov. Edwin I. Jubahib ang mga benepisyaryo nga gamiton sa sakto ang ilang nakuha nga ayuda aron mapadayon ang paglambo sa ilang mga kinabuhi. Dugang pa sa gobernador nga ang maong pondo sa gobyerno dapat gyud mapadulong sa mga tao apan dili kini nagpasabot nga pwede gamiton basta basta sa mga butang nga walay kapuslanan.

Kahinumdoman nga ang maong mga benepisyaryo ang mga mananaog sa indigay niadtong miaging Nobyembre sa pagsaulog sa probinsya sa Children's Month pinaagi sa tele-radyo program nga Kasamtangang Katikaran sa Kalamboan (KKK) ubos sa pagdumala sa Provincial Social Welfare and Development Office (PSWDO) kauban ang Department of Social Welfare and Development (DSWD) XI - Davao del Norte.

Si Maylen But nga taga Alejal, Carmen mapasalamaton gyud sa iyang nadawat nga ayuda nga plano niya gamiton aron mapadayon ang kanhi naputol nga ‘hog raising’ business tungod sa pagbutho sa African Swine Fever kon ASF.

Gipasabot pag-ayo nila DOLE Provincial Director Angelina Talingting ug Community Facilitator Dave Andrie Villegas ang mga responsibilidad nga nakalakip sa maong ayuda. Gipasalig sab ni Labor and Employment Officer Lalaine Apugan nga andam sa kanunay ang DOLE nga mogiya sa mga benepisyaryo sa pag-implementar sa ilang mga napili nga negosyo.

Anaa sab sa seremonyas sila Assistant PSWDO Jeffrey Calamongay ug ang mga Social Welfare Officers nga sila Fevelyn Marfe ug Lanny Guinit.