Sa tinguha nga makab-ot ang inklusibong kalamboan sa Probinsya, gisiguro ni Governor Edwin “Kuya Gov” I. Jubahib nga mahatagan og patas nga katungod sa edukasyon, trabaho, ug panginabuhian ang Persons with Disabilities (PWDs) sa Davao del Norte.

Sa mensahe ni Kuya Gov atol sa selebrasyon sa 44th National Disability Prevention and Rehabilitation Week kagahapon, Hulyo 19, sa DavNor Gym, gipasalig sa gobernador nga padayon ang pagtanyag sa Probinsya og mga programa ug serbisyo nga magpalambo sa kahimtang ug kinabuhi sa PWDs.

“We intend to create a truly inclusive and compassionate society that embraces each and every person regardless of their ability or disability. So, we are focusing our programs to fully realize the worth of our PWDs as valuable assets in our society by providing them better education, decent work and livelihood, among other services. We are committed to bring them hope for a brighter future,” matod sa mensahe sa gobernador nga gihatod ni Executive Assistant Arch. Leomel Puerto.

Gani, sa bag-ohay lang gipalapdan ug mas gipakusgan nga KUYA GOB NG MASA Development Agenda ni Gobernador Jubahib, usa sa nadugang nga mga component mao ang [N] “Nurturing Society” nga nagatinguha og luwas, lig-on, ug maamumahong komunidad alang sa mga vulnerable sectors, lakip na ang Persons with Disabilities.

Samtang gihinganlan ni Provincial Social Welfare and Development (PSWD) Officer Rosalinda O. Rapista ang pipila ka mga programa ug serbisyong gitanyag sa Probinsya aron mahatagan ang PWDs og patas nga edukasyon, trabaho, ug panginabuhian.

“Aside from the assistive devices na atong ginahatag, nakigtambayayong pud kita with the DepEd… Nagaplano kita na katong dili gyud maka-eskwela, naa na na sa atoang plano nga home study ba… Kita sa Provincial Government, mutabang ta og hatag sa ilang mga supplies… Also, we are planning na katong mga dili na gyud makabangon na mga PWDs, this year tagaan nato sila’g mga ayuda⁠—mga personal needs nila like diaper, mga pagkaon… Especially livelihood, so we are tapping with different agencies like DSWD ug DOLE para pa sila nato matabangan,” saysay ni PSWDO Head Rapista.

Malipayon ug mapasalamaton ngadto sa Probinsyal nga Panggamhanan si Ricardo C. Biag Jr., taga Mankilam, Tagum City, kinsa nadayagnos nga dunay Poliomyelitis, nga sa samang higayon naghinaot nga unta dili lamang kutob niini nga kasaulogan ang paghatag og pagtagad sa gobyerno sa sektor sa mga disabled people.

“Well there are many challenges jud isip isa ka person with disability… Pero sa among mga advocacy nga ginahimo sama ani, dili na kaayo namo mabati ang discrimination… So we are very glad and we are very thankful sa atong governor Kuya Edwin Jubahib… nga gipahitabo gyud ni siya nga activity and I hope dili lang ta kutob diri mahuman… I hope nga naa pay sunod mahitabo nga kabag-ohan para sa amoang sektor sama sa natad sa panarbaho, natad sa education, natad sa scholarship, natad sa livelihood. So kami, willing mi to submit to the government kay kami wala man pud mi diri kung wala ang gobyerno,” sulti ni Biag.

Nagkadaiyang mga aktibidad, pagbansay, ug kompetisyon ang gipahitabo alang sa PWDs sa Davao del Norte isip pagsaulog sa week-long NDPR celebration. Kini naglakip sa Song Rendition ug Tiktok Show Contest, Water Survival Training, Balloon Twisting, ug Indoor Sport Games.

Gani karong adlawa, mipahigayon sab ang PSWDO sa pakigtambayayong sa DavNor Provincial Health Office (PHO) og libreng paghatod og medikal nga mga serbisyo alang sa mga PWDs.