Gikauyonan sa Sangguniang Panlalawigan (SP) sa Davao del Norte ang pag-reappoint ni Kuya Gov. Edwin I. Jubahib sa tulo ka Provincial Government Department Heads alang sa iyang ikaduhang termino isip gobernador. Kini atol sa 4th Regular Session niadtong Hulyo 25.

Pinaagi sa Resolutions No. 432, 433 and 434, Series of 2022, padayon nga manilbihan isip Provincial Government Department Heads alang sa posisyon nga Provincial Administrator si Engr. Josie Jean R. Rabanoz, Provincial Legal Officer si Atty. Charina C. Cabrera, ug Provincial Information Officer si Dr. Mervin Jay Z. Suaybaguio.

Nakuha sa maong re-appointed officials ang boto sa tanang SP members nga nitambong gawas kang Board Member Nicandro T. Suaybaguio, Jr. nga nipadayag sa iyang pag-“inhibit” sa katungod sa pagboto alang sa mga posisyon sa Provincial Administrator ug Provincial Information Officer kay tungod si Engr. Rabanoz ug Dr. Suaybaguio iyang mga paryente.

Gipadangat ni Board Member Orly Amit ang iyang paglaom nga ang maong mga department heads mutabang gyud sa gobernador ug ang ilang tambag maoy mahimong tulay ngadto sa Legislative Department alang sa padayong kahiusahan ug kalamboan sa probinsya.