Malampuson ang gipahigayong Grand SPES Day 2022, sa Davnor Gym, DNSTC, Mankilam, Tagum City, niadtong Agosto 3.
Dul-an 300 ka mga Special Program of the Employment of Student (SPES) Grantees, ang mitambong sa maong programa, nga naggikan sa nagkadaiyang LGU sa probinsya sa Davao del Norte.
Gipasalamatan ni Provincial Administrator Engr. Josie Jean Rabanoz ang Department of Labor and Employment sa padayong pag-implementar sa SPES Program nga dako’g natabang sa mga naglisud apan adunay katakos nga mga estudyante.
“On behalf of the Provincial Government of Davao del Norte, I would like to thank the Department of Labor and Employment (DOLE) –Davao del Norte Field Office for continually implementing the SPES or the Special Program of the Employment of Student. Indeed, our partnership throughout this years have been a fruitful journey and that is to provide our financially disadvantage but deserving student, through giving them temporary employment. While giving them the opportunity to experience first-hand, what it is like to be working in the government and develop their work ethics, confidence and professionalism at work,”sulti ni Rabanoz.
Niduyog sa maong kalihokan si Gobernador Edwin “Kuya Gov” Jubahib ug gipaambit ang iyang pait nga kasinatian sa kinabuhi atubangan sa mga estudyante, gikan niadtong naghilaid pa ang iyang pamilya sa kalisud. Pagsubay sa gobernador nga daghang mga trabaho ug kalisdanan ang iyang naagian hangtud naabot niya ang iyang nahimutangan karon.
Tambag ni Kuya Gov nga maningkamot ug dili dayon madiskuryo aron makab-ot ang mga pangandoy sa kinabuhi. Samtang, gipasalig usab niya ang iyang kanunayng suporta ngadto sa mga SPES grantees.
“Nga niagi ko pagka-utility, niagi ko’g pamaligya sa palengke, bata pako niagi nako’g pang-jumble og gulay, namaligya’g balot, hangtud pag-college nag-bus conductor. So wala nako damha nga hangtud nahimo kong negosyante gumikan sa akong pagpaningkamot. Nahimo kong usa ka contractor. Nahimo nang successful ang akong life. Abi nako didto ra ko taman, nga magpabilin ko pagkanegosyante. Pero wala nako damha naa pa diay laing calling sa akong life. Mao na ni ‘ron nga nahimo ko ninyong governor dinhi sa Davao del Norte. Ang Provincial Government Unit andam nga mohatag og suporta sa inyong pangandoy sa inyong kinabuhi,”pagsaysay sa gobernador.
Isip pagtamod sa kamandoan ni Presidente Ferdinand “Bongbong” Marcos, Jr. aron paspas mabalik ang dagan sa ekonomikanhong aspeto sa probinsya, nanawagan usab ang gobernador sa mga kabatan-onan sa paghangyo sa ilang mga ginikanan aron magpabakuna.
“Hangyoa sila, dili man nato i-force gyud sila o pugson nato pero hangyoa sila para pud sa ilang safety. So, kinahanglan magpa-vaccine ta kay ang panawagan sa atong mahal nga presidente karon, gikinahanglan na magpa-vaccine na ang tanan para makabalik ta sa atong economic activity,”panawagan ni Kuya Gov.
Dakong kalipay ang gibati ni Sophia Bianca Gonzales, usa ka SPES Grantee, gikan sa LGU Talaingod, gumikan sa oportunidad nga iyang nadawat ug sa kasinatian nga naangkon sa pagpanarbaho sa buhatan sa gobyerno. Nagpaabot kini sa iyang pasalamat kang Mayor Jonnie Libayao sa moang lungsod ug kang Governor Edwin “Kuya Gov” Jubahib, gumikan sa makanunayong suporta sa mga nasampit nga opisyal.
“Gusto nako pasalamatan ang amoang Mayor Jonnie Libayao ug si Governor…Kuya Gov Edwin Jubahib po. Thank you po sa opportunities sir sa SPES babies nga gitagaan me nimo og trabaho and dungag income sa amuang pag-eskwela sir nga naa mi makuha nga allowance this month,”pagdayeg sa batan-on.
Atol sa maong selebrasyon, gipahigayon usab ang Search for Mr. and Miss SPES 2022, diin gikoronahan si Joan Cabatingan isip Miss SPES 2022 ug si Leoncio Alampayan II ang Mr. SPES 2022 nga puros garbo sa Panabo City. Samtang nasungkit usab sa naasoyng siyudad ang kampeonato sa SPES Showtime Competition.
Writer: Nestor H. Mata, Jr.
Photo Credits: PESO Davao del Norte
