Paspas nga mitubag ang Probinsyal nga Panggamhanan sa Davao del Norte sa nahitabong landslide sa Purok 11, Upper Mesolong, lungsod sa Talaingod.
Sa mando ni Gobernador Edwin “Kuya Gov” Jubahib, gilayong milarga ang rescue team sa probinsya sayo sa kabuntagon sa dihang nadawat nila ang pagpakitabang sa mga kabanay aron sa pagsuta sa kahimtang sa mga apektadong pamilya ingon man sa pagpang-apud sa mga pangunang hinabang.
Gitunol sa Provincial Social Welfare and Development Office (PSWDO) ang 100 ka family food packs ngadto sa mga apektadong pamilya. Nagpahigayon usab og assessment ug clearing operation ang Provincial Disaster Risk Reduction and Management Center ug ang Provincial Engineering Office.
Samtang nidalit usab ang Department of Social Welfare and Development (DSWD) og 60 ka family food packs ug 30 ka sleeping kits alang sa mga biktima sa naasoyng kalamidad.
Sa datus sa PSWDO mokabat sa 10 ka pamilya ang grabeng naapektohan kinsa temporaryong gipapuyo sa ilang mga parente o sa farmhouse nga duol sa lugar. Upat (4) ka balay ang hingpit nga natumpag samtang duha (2) dunay gamayng guba.
Kahinumdoman nga kalit lang nidahili ang yuta sa ibabawng bahin sa maong dapit nunot sa kusog nga bunok sa ulan sa tungang gabie, Agosto 11, 2022. Upat ka mga panimalay sa Pabahay sa Gobyerno nga ginganla’g Balay Pig Imemmanan ang natabonan hinungdan sa kamatayon sa usa ka 60 anyos nga lalaki.
Gisulayan pa sa LGU Talaingod ug mga kasundalohan ang pag-rescue sa maong tigulang, duha sila sa iyang asawa, apan nabugtoan na kini sa gininhawa una pa makaabot sa balay-tambalan. Swerteng naluwas ang iyang asawa nga kasamtangang nagpaalim sa Kapalong District Hospital.
Writer: Nestor Mata, Jr.
Photo credits: Engr. Brryll Lugatiman, LDRMMC-Talaingod / PSWDO / PEO
