Dili lang kay pasado pero pinakataas pa ang grado nga nakuha sa Kapitolyo sa Davao del Norte sa pagpatuman niini sa Government Energy Management Program (GEMP), aron sa pagdaginot sa enerhiya sa mga pampublikong opisina.
Nakuha sa Kapitolyo ang “5 star-energy rating or 95.45%”, atul sa gipahigayon nga ‘spot checking’ sa audit team sa Department of Energy Mindanao Field Office (DOE-MFO) niadtong milabay nga August 11, 2022.
Nasuta sa audit team nga gipangunahan ni Senior Science Research Specialist Engr. Virgilio B. Arzadon, nga hugot ang pagpatuman sa probinsiya sa Davao del Norte sa R.A. 11285, kon Energy Efficiency and Conservation (EEC) Act.
Sa iyang pag-implementar sa maong balaodnon, gimandoan ni Governor Edwin “Kuya Gov” I. Jubahib ang mga opisina sa Kapitolyo sa pagsunod sa mga gitakna nga ‘austerity measures’ kon mga lakang pagdaginot sa konsumo sa petrolyo ug kuryente.
Lakip niini nga mga lakang aron sa saktong maintenance sa mga sakyanan kada opisina, paggamit sa LED lamp, pagpalong sa mga suga ug computer panahon sa break sa tingpaniudto, ug paggamit lang sa mga air-conditioning units gikan alas- 9 sa buntag hangtud sa alas-4 sa hapon samtang imintinar ang room temperature nga 24C.
Gitunol ni Engr. Arzadon ang pinakataas nga grado sa probinsiya ngadto kang Provincial Administrator Engr. Josie Jean R. Rabanoz, kauban si Provincial Planning and Development Coordinator Nelson F. Plata ug Assistant Provincial Administrator for Administrator Gale Guadalupe.
Gipaniguro sab ni Rabanoz, kinsa mao ang EEC Chairperson sa probinsiya, ang pagsubay sa Kapitolyo sa mga dugang rekomendasyon sa DOE Energy Audit Team, alang sa paglig-on sa pinakamaayo nga mga lakang sa pagdaginot sa enerhiya.
Tumong sa programang GEMP ang pagkunhod sa binulan nga konsumo sa gobyerno sa petrolyo ug kuryente ngadto sa 10 percent, pinaagi sa mga estratehiya alang episyente nga paggamit ug pagkonserba sa enerhiya.
