78,000 ka mga hito ug tilapia fingerlings ang gipang-apod apod sa 98 ka mga benepisyaryo sa KAwsa sa AGrikulturA ug PAnginabuhian sa barangaY kon KAAGAPAY, atol sa paglusad sa KAAGAPAY Agri-Fishery program sa panguna sa Provincial Agriculturist Office, sa New Casay Gym, Braulio E. Dujali, niadtong Agosto 10, 2022.

Gitambongan kini sa mga benepisyaryo gikan sa lima (5) ka mga local government unit (LGU’s); 40 gikan sa B.E. Dujali, 20 sa Sto. Tomas, 16 sa Tagum City, 13 sa Asuncion ug siyam (9) sa Carmen. Kasagaran kanila nakadawat og tag-usa ka libong fingerlings sa tilapia o kaha hito. Samtang ang pipila mas dyutay ang nadawat gumikan sa kagamay sa ilang area ug availability sa semilya. Nakadala usab sila’g tag-lima (5) ka kilong fry mash isip pasiunang pakaon sa mga isda.

Sumala ni Assistant Provincial Agriculturist Engr. Leonilo Patayon, nga gipahigayon ang launching sa maong lungsod sanglit gikonsidera kining tilapia capital sa probinsya.

“Ang atong ginahimo karon is launching of the KAAGAPAY Fisheries Production Program. Nganong diri sa Dujali because Dujali is considered as the Tilapia Capital of Davao del Norte... Nagsugod ang KAAGAPAY Program sa vegetables production. Nagpadayon sa free-range chicken production. Karon naa na poy agro-forestry. Ug karon fisheries production. The same ang intension, it is food sufficiency and productivity. Daghang mga bangag-bangag diri. Daghan ta’g tubigan diri nga walay income. Kanang mga tubigan gani nga lisud tanuman og humay, alanganin, mas maayo pa’y atong buhian og tilapia,’’ pagsaysay ni Engr. Patayon.

Matud ni Gobernor Edwin “Kuya Gov” Jubahib nga ang paglusad sa agri-fishery maghatag kabaskog sa KAAGAPAY program nga mamahimong all-in-one, all-inclusive program tungod sa nagkadaiyang proyekto nga sakop niini. Maghatag kini’g katumanan sa iyang strategic direction sa umalabot nga tulo ka tuig.

“Sa kasamtangan liboan na ka mga Davaonon ang nakabenepisyo sa maong programa ug padayon nga nagataas ang ihap... Ang paglusad sa atoang agri-fishery maghatag pa’g kabaskog sa atong KAAGAPAY program nga mamahimo unyang all-in-one, all-inclusive program tungod sa nagkadaiyang proyekto nga sakop niini… Ang paglusad usab sa atong agri-fishery ubos sa KAAGAPAY program, naghatag katumanan sa atong strategic direction sa umaabot nga tulo ka tuig… Nanghinaot ako nga kamong tanan malipayon sa proyekto nga nadawat ninyo. Ug laomi nga kami sa probinsyal nga panggamhanan anaa sa inyong kiliran aron maghatag og suporta kaninyo, aron mapalambo pa ang maong proyekto, ug gilayon mas daghan pa ang matabangan og makabenepisyo niini,” mensahe ni Kuya Gov pinaagi sa iyang Executive Assistant Wowee de Ramos.

Gidayeg ni Elisa Pil, ang OIC, Fisheries Production and Support Services Division sa Bureau of Fisheries and Aquatic Resources XI (BFAR-XI), ang programang KAAGAPAY nga gimugna ni Kuya Gov sa panahon sa pandemya.

“Nindot kaayo nga programa ang KAAGAPAY Project kay makatabang ni siya sa pag-increase sa atoang fisheries production. Makatabang pud sa food sufficiency kay mao baya gyud ‘ni ang priority sa atoang bag-ong administrasyon, ang food sufficiency,” sulti ni Pil.

Nagpaabot si New Casay Brgy. Captain Ramonito Cabasan sa iyang dakong pasalamat kang Kuya Gov tungod sa pagpili sa ilang lugar diin gilusad ang Agri-Fishery Program sa KAAGAPAY.

Matud ni Cabasan nga dako kaayong tabang sa iyang mga ginsakopan ang maong proyekto, sanglit makahatag kini’g dugang kita alang kanila.

“Dako kini kaayo’g ikatabang, labi na sa atong inadlaw-adlaw nga pagkaon ug dugang income sa atong panginabuhian sa matag mag-uuma mao nang dako kaayo ang among pagpasalanat. Proud mi nga at least nga gihatag ni Gov ang priority diri sa Barangay New Casay,” pagpasalamat sa punog barangay.

Kalipay usab ang gibati ni Datu Estilito Vicente, ang kasamtangang IPMR sa Barangay Sonlon, Asuncion, usa sa mga nakadawat sa tilapia fingerlings.

“Tungod kay kining panahona lisud kaayo ta kung wala ta’y mga ing-ana nga mga project so, dako namo’g pagpasalamat sa among halangdong gobernador nga diin siya nagahatag og programa nga susama niini aron ma-sustain o molahotay ang among panginabuhian ug madungagan ang among income,” pag-soy sa IPMR.

Writer: Nestor Mata, Jr.
Photo Credits: Provincial Agriculturist’s Office-Davao del Norte