86 ka mga estudyante nga dunay deperensya sa panan-aw ang nakadawat og libreng checkup sa mata ug libreng antipara atol sa kasaulogan sa Sight Saving Month sa Bulwagan ng Karunungan, Government Center, Mankilam, Tagum City, niadtong Agosto 19, 2022.

Naggikan sa 13 ka mga tulonghaan sa siyudad sa Tagum ang mga benepisyaryo nga natumbok nang daan ang ilang balatian human nga gipailawom sa vision screening sa ilang tagsa-tagsa ka tulonghaan.

Tumong sa maong programa nga mahatagan kasulbaran ang problema sa mga kabataan, labi na ang ilang panan-aw. Matud ni Carla Mae Abrenica, ang Prevention of Blindness Program Focal, gikan sa DepEd Tagum Central District, dunay mga optometrist ug ophthalmologist ang gipaadto aron sa pagcheckup kanila.

Human masuta ang depekto sa ilang mata, gihatagan sila’g antipara nga sibo sa ilang panan-aw gikan sa Provincial Health Office.

“For children na identified po na may errors of refraction o problema sa grado sa mata. Ang goal is matagaan nato og libreng salamin ang mga batang naglisud sa panan-aw dala sa grado sa mata… In behalf po of our Schools Division Superintendent Dr. Josephine L. Fadul, kami po lahat sa health and nutrition section, ay nagpapasalamat po kay Kuya Gov for having this activity, for sponsoring our 86 learners nga makadawat og salamin,” saysay ni Abrenica.

Sumala ni DavNor Provincial Health Officer Dr. Alfredo Lacerona, nga gimandoan siya ni Kuya Gov sa pagprayoridad niini ug gilayong nigahin og pondo aron maimplementar ang naasoyng programa, subay sa Sight Saving Month Celebration.

“Ang atoa na lang ani, ato na lang silang sukdan og unsa ang ilang grado, kay ang uban aning mga bataana lahi-lahi’g mga grado sa mata. Lahi ang pikas lahi ang sa pikas mao na special lenses gyud ni sila. Dili ni sila pwede mogamit og reading glasses nga mapalit nato sa tindahan nga isul-ob na lang. Special gyud ning ilaha. Mao nang pasalamat pud ko nga gitagaan og pagtagad ni Kuya Gov, kay kung siya pa, “Mga bata na, daghan pa na’g maabot. Sayang ang ilang eskwela kung dili sila makat-on sa eskwelahan.” Mao nang naay tagline dinha nga basta kay Kuya Gov May Bright Eyes kana, Magkaka-Bright Future ka pa,” sulti sa PHO Head.

Dugang ni Dr. Lacerona, nga gimandoan siya ni Kuya Gov nga ipadayon ang maong programa sa matag lungsod dinhi sa probinsya sa umalabot nga mga bulan.

Nagpaabot sa iyang dakong pasalamat ang usa ka ginikanan nga si Jackilou Aguilar, residente sa Brgy. Liboganon, niining siyudad, kang “Kuya Gov”, sanglit isa ang iyang sais-anyos nga anak nga nakabenepisyo sa programa.

“Isa ang akong anak sa beneficiary sa eye screening ni Governor Edwin Jubahib kay ang isa ka mata sa akong anak dili kaayo kaklaro og layo… Dakong pasalamat kay nakabuhat si Governor Edwin Jubahib ani nga programa para sa mga libreng eyeglasses sa mga bata nga naay kuan sa mata. Dako gyud kaayo ang akong pasalamat kay isa ang akong anak nga naka benefits niini nga programa,” pasalamat sa inahan.

Writer: Nestor Mata, Jr.

 

 

 

DavNor News