Gipangunahan ni Department of Health (DOH XI) Regional Director Dra. Anabelle P. Yumang, ang PinasLakas alang sa mga Person’s Deprived of Liberty (PDL) kon mga binilanggo sa Davao del Norte Provincial Rehabilitation Center, sa Capitol Compound, Mankilam, Tagum City, niadtong Agosto 19, 2022.

Sa iyang mensahe, gisaysay ni Dr. Yumang, ang kaimportante sa pagbakuna sa mga binilanggo, sanglit daghan sila sulod sa selda, delikado kung dunay mataptan sa Covid-19 posibleng daghan ang matakdan.

Kini ang hinungdan nga gidala na gyud sulod sa provincial jail ang PinasLakas aron mabakunahan ang tanan. Gawas niana, maglisud sab sila’g pabakuna sa gawas tungod sa ilang kahimtang. Magsilbi kining dugang proteksyon alang sa mga PDL batok Covid-19.

“Daghan kaayong salamat Gov sa imohang suporta. Na-appreciate kaayo namo. Nalipay kaayo kami sa Department of Health nga dako kaayo ang suporta nga imong gihatag sa mga health programs, labi na karon sa atong Covid-19 vaccination,” pasalamat sa regional director.

Subay sa direktiba ni Presidente Ferdinand “Bongbong” Marcos, Jr., giawhag ni Dra. Yumang ang mga senior citizen nga magpabakuna na. Kinahanglan sab nga magpa-booster ang mga nakakuha na sa first dose ug second dose.

“Sa bag-ong direktiba karon sa atong President, kinahanglan makuha pud nato ang 90 percent sa atoang senior citizens nga makadawat na gyud sa ilang primary series or kadtong first and second dose sa atoang Covid-19 Vaccine. Ikaduha nga direktiba sa atoang President nga kinahanglang katong mga eligible population nga nakadawat sa ilang first and second dose nga madawat na pud nila ang ilang booster dose,” pagsubay ni Yumang.

Gikalipay ni Davao del Norte Provincial Warden Darius Sawan, ang pagsulod sa PinasLakas sa provincial jail, labi na ang pagbisita sa mga kadagkoan sa DOH XI ug Provincial Health Office, nga matud pa makahatag dugang kadasig ug makaagni sab sa wala pa nagpabakuna.

“Magpasalamat ko kay na-priority ning amoang area. Naa ra baya sa suok-suok. Magpasalamat mi kay Director Yumang tungod sa iyang pagpanguna nga moanhi gyud siya sa among lugar,” pagbutyag sa warden.

Dako ang pagpasalamat ni Provincial Health Officer Dr. Alfredo Lacerona, kang Governor “Kuya Gov” Jubahib tungod sa padayong pagtaas karon sa ihap sa mga nagpabakuna sa probinsya. Tungod sa mga inisyatibo nga gihimo sa gobernardor nadasig ang katawhan sa pagpabakuna nga niining tungora gidala na mismo sa mga kabaranggayan ug sa nataran sa katawhan.

“Pasalamat dyud ko ani, in behalf sa amoang team dinhi sa probinsya, sa PHO. Pasalamat dyud ko’g dako kay Kuya Gov Edwin sa iyahang suporta nga gihatag sa PinasLakas karon. Paspas ang responde sa atong mga senior citizen. Abtik kaayo sila magpabakuna tungod sa iyang initiative sa pagpanghatag og mga ayuda,” sulti sa PHO Head.

Writer: Nestor Mata, Jr.

 

 

 

DavNor News

nainggo