Misaad si Gobernador Edwin “Kuya Gov” I. Jubahib nga iyang ilisan ang mga housing units o ang mga balay nga natumpag dala sa bag-ohay lang nahitabong landslide sa Upper Mesolong, Talaingod, Davao del Norte.

Atol sa iyang pagbisita niadtong Agosto 19, sa mismong dapit diin nahitabo ang insidente, nadesisyonan sa gobernador nga dili una papuy-an og balik ang mga balay samtang wala pa mahuman ang clearing operation.

“Hangyuon mo nako nga dili sa mubalik og puyo sa inyong housing… hangtod nga dili mahuman ang pag-clearing sa maong area. Unya katong naguba… atoa nang replace-an para makabalik gihapon og puyo”, saad sa gobernador.

Sa pagsusi ni Kuya Gov sa landslide area inubanan sa Provincial Disaster Risk Reduction and Management Division (PDRRMD) ug Provincial Engineering Office (PEO), giplanohang hingpit nga bungkagon ug ipatag ang maong yuta.

“So kanang tanan nga naa sa highest level sa yuta, ato nang i-knock down. Mopatag na na siya, dili namo delikado. Butangan na lang nato’g basketbolan”, dugang ni Kuya Gov.

Kauban ang Provincial Social Welfare and Development Office (PSWDO), nanguna sab ang gobernador sa pagpang-apod-apod sa 100 ka family food packs ngadto sa mga residente sa apektadong komunidad.

Gitunol ni Kuya Gov ang P10,000 pinansyal nga hinabang ngadto sa upat (4) ka pamilya nga dunay ‘totally-damaged’ nga balay, gikan sa pondo sa probinsyal nga panggamhanan.

Samtang ang duha (2) ka pamilya nga dunay ‘partially-damaged’ nga balay, nakadawat sab og P5,000 matag usa.

Mapasalamaton si Barangay Sto. Niño Barangay Captain Romy Bucaron sa maabtikong tabang nga hatud sa Probinsyal nga Panggamhanan sa Davao del Norte. Sa samang higayon, nanawagan siya nga unta mapakusgan pa ang disaster preparedness labi na sa mga peligrosong dapit, sama sa Talaingod.

“Nagpasalamat ko sa atong Local Provincial Unit sa Davao del Norte nga ikaduha nilang hatag karong adlawa… Unta matabangan mi sa Local Government Unit sa Talaingod ug sa Probinsya nga… matagaan mi og gamay nga information drive para kung mag-ulan, unsay bantayanan namo nga para mamakwit na ang mga tao”, sulti ni Kapitan Bucaron.

Human sa relief operation sa Talaingod, midiretso dayon si Kuya Gov sa Barangay Gupitan, Kapalong aron i-survey sab ang landslide area sa Sitio Ukapan-Kimataan Dose Road.

Writer: Gwyn Kelly O. Lobitos

 

 

 

DavNor News

nainggo