Gipahigayon ang groundbreaking ceremony sa upat (4) ka mga proyekto ni Congressman Pantalion Diaz Alvarez, niadtong adlawng Sabado, Agosto 20, 2022, sa managlahing lugar sa Brgy. Magdum, ug Brgy. Magugpo South, Siyudad sa Tagum.

Unang proyekto nga pagatukoron ang usa ka dakong kanal nga moprotekta sa sementadong dalan sa National Road o ang Daang Maharlika Highway, nga nagkantidad og P9.8 milyones. Gisugdan kini niadtong Agosto 18 ug gibanabanaang mahuman karong Disyembre 26 niining tuiga.

Makatabang ang maong proyekto sa pagsulbad sa baha sa lugar panahon nga kusog ang bunok sa ulan. Dili na sab magpundo ang tubig baha tunga sa kalsada inig mahuman na kini.

Ikaduhang proyekto mao ang pagbutang og bleacher sa gym nga nahimutang sulod sa Magdum National High School. Mobalor kini’g P2.9 milyones, nga gisugdan niadtong Agosto 11, ug gibanabanaang mahuman karong Disyembre 8, 2022.

Ikatulong proyekto mao ang multi-purpose building, ang pagsumpay sa Brgy. Hall sa Magdum nga gipondohan og P3.8 milyones. Gisugdan kini niadtong Agosto 18, 2022 ug gibanabanaang mahuman karong Nobyembre 30 sa kasamtangang tuig.

Samtang ang ikaupat nga proyekto mao ang pagatukorong Brgy. Hall sa Magugpo South, sa bag-o niing lokasyon kilid sa Sison Subdivision. Nagkantidad kini’g P3.9 milyones, gisugdan niadtong Agosto 18, ug mahuman karong Disyembre 15, 2022.

Sumala ni Congressman Pantaleon Diaz Alvarez, nga na-download na ang pondo alang sa maong mga proyekto maong gisugdan gilayon ang pagtukod niini.

Nagpadayag sa iyang kalipay si Jasmin Nesperos ang Principal sa Magdum National High School, gumikan sa katumanan sa ilang mga hangyo nga mahimoan og bleacher ang ilang gym nga dako kaayo’g ikatabang kanila ilabi na sa mga estudyante sanglit mibalik na ang face to face nga klase niadtong Agosto 22. Nagpaabot sab kini sa iyang pasalamat kang Congressman Alvarez sa paghatag sa maong proyekto.

“Kami diri sa Magdum National High School, mapasamalamaton kaayo niining maong project nga gihatag ni Congressman Pantaleon Alvarez para sa school kaning bleacher. Makatabang gayud og dako para sa atong mga estudyante puhon sa pagbalik nila sa face to face. Timing gyud kaayo ni siya nga project para magamit gyud nato sa atong mga estudyante,” pagbutyag sa principal.

Human sa ground-breaking ceremony, gipahigayon ni Cong. Alvarez ang iyang bersyon sa Kapehan sa Barangay, diin iyang gikuha ug gipaminaw ang mga mulo, yangungo, ug panginahanglan sa mga katawhan aron iyang mahatagan og hinanaling kasulbaran.

Writer: Nestor H. Mata, Jr.

 

 

 

DavNor News

nainggo