Pormal nang milingkod isip Ex-Officio member atol sa 9th Regular Session sa Sangguniang Panlalawigan si Panabo City Councilor ug bag-ong Presidente sa Philippine Councilor’s League - Davao del Norte Chapter Atty. Devona Jumamil hulip ni Asuncion Councilor Silvino Matobato, Agosto 30, 2022.

Sa wala pa sugdi ang sesyon, gihimo una ang pagpanumpa ni Atty. Jumamil ingong bag-ong miyembro sa SP-Davnor sa panguna ni Vice Governor Decarlo “Oyo” Uy.

Mapasalamaton ang bag-ong PCL president gumikan sa paghatag kaniya’g oportunidad nga mangulo sa mga konsehales sa probinsya.

Sumala niya, iyang tutokan ang pagpanday og mga polisiya nga nagalantaw sa ilang kaayohan. Plano niya nga maghimo’g balaudnon alang sa paghata’g medikal ug burial assistance sa iyang mga ginsakopan. Laraw sab niya ang pagpatukod og usa ka gambalay nga mamahimong opisina sa PCL.

Gunitan ni Jumamil ang komitiba sa Human Settlement ug ang Planning and Development, nga kanhing ubos sa pagdumala ni Matobato.

Usa ka aktibong abogado si Jumamil, ug kasamtangang konsehal sa Siyudad sa Panabo sa ikaduhang temino. Produkto sab siya sa pamilya sa mga abogado sa maong lungsod.

Kahinumdoman nga nakuha ni Atty. Jumamil ang kadaugan isip presidente sa PCL niadtong Agosto 12 ning tuiga, human walay niatbang niya sa gipahigayong eleksiyon sa PCL sa usa ka hotel sa Dakbayan sa Davao.

Una nang nanumpa si Atty. Jumamil, atubangan ni Governor Edwin Jubahib niadtong Agosto 23, inubanan sa presensya ni DILG OIC – Provincial Director Jonathan Leybag.

Writer: Nestor H. Mata, Jr.

 

 

 

DavNor News