Malampuson ang gipahigayong tulo ka adlaw nga Executive Legislative Agenda (ELA) 2022-2025 sa Probinsyal nga Panggamhanan sa Davao del Norte niadtong Agosto 24, 2022.

Gitambongan kini sa mga opisyales sa probinsya nga gipangunahan ni Governor Edwin “Kuya Gov” Jubahib, Vice Governor Decarlo “Oyo” Uy, mga Board Members, ug mga Department Heads sa nagkadaiyang departamento sa kapitolyo.

Sumala ni Nelson Plata ang Provincial Planning and Development Coordinator, nga gihimo ang maong ELA aron mahimong sumbanan sa mga programa ug proyekto sa sunod nga tulo (3) ka tuig, ilabi na nga dunay bag-ong mga napiling opisyales dinhi sa probinsya.

Dugang ni Plata, nga gikinahanglan nga mopasa ang mga Local Government Units (LGU) sa ilang ELA karong umalabot nga Octubre 26, sa kasamtangang tuig.

“Nakalatad na ang atong mga programa like atong sa infrastructure, social services, and then sa education and sports. Daghang mga programa, pero as of now, ato pa siyang gi-finalize and hopefully, actually tulo (3) ka phases ang atong ELA preparation. Karon nga time ang atoang first draft, the next phase is ‘yong writeshop and then sa final phase hopefully sometimes September 3rd week. Atong i-present ang final draft together with the Executive and Legislative Department para lang i-adopt ang maong ELA,” pagsaysay ni Plata.

Sumala ni Governor Edwin “Kuya Gov” Jubahib, nga ang tanang mga plano og programa sa iyang administrasyon nagasubay kini sa iyang KUYA GOB NG MASA Development Agenda. Magsilbi kining direksyon alang sa pagkab-ot sa malungtarong ekonomikanhon ug katilingbanong kalamboan.

Nihangyo si Jubahib sa mga miyembro sa Sangguniang Panlalawigan nga magtinabangay sila aron maimplementar ang mga hustong programa alang sa mga Dabaonon. Giawhag sab ni Kuya Gov ang tanan nga magkahiusa alang sa kalamboan sa probinsya.

“Bisan unsaon nato’g plano kung wala ta’y maayong relationship sa Sangguniang Panlalawigan, dili ta magkahiusa, dili gyud madayon. So, gikinahanglan gyud nato ang best relationship within sa Sangguniang Panlalawigan kay ang tanang plano sa executive mo-undergo man og approval sa Sanggunian. Ug kamo pud sa Sangguniang Panlalawigan ang mo-scrutinize and mo-correct basin naay mga mali nga plano ang Executive Branch. So, before nato ma-approve, ma-perfect na sa Sangguniang Panlalawigan,” pagpasabot ni Kuya Gov.

Dugang sa gobernador nga ang iyang development agenda giumol agi’g suporta sa katumanan sa giduso ug mga prayoridad ni Kanhi Presidente Rodrigo Roa Duterte ug ang malungtarong panglantaw sa nasudnong gobyerno aron tapuson ang kakabos sa tuig 2040.

Sa habig sa Sangguniang Panlalawigan, pinaagi kang Vice Gov Oyo, nagkanayong andam sila sa pagsuporta sa tanang mga programa sa gobernador ilabi na kung kini nahisubay sa mga prayoridad ni Presidente Ferdinand “Bobong” Marcos Jr. ug makahatag kaayohan sa mga Dabaonon.

Writer: Nestor H. Mata, Jr.

 

 

 

DavNor News