Malaumon ang mga opisyales sa Probinsyal nga Panggamhanan sa Davao del Norte nga subling maangkon ang prestihiyosong pasidungog nga Seal of Good Local Governance (SGLG) 2022 Award sa Department of Interior and Local Government (DILG), human sa gipahigayong national validation niadtong Agosto 25, 2022 sa Pavillion, DNSTC, Mankilam, Tagum City.

Usa ka team gikan sa Northern Mindanao nga gipangunahan ni DILG Region X Assistant Regional Director Yvette T. Sunga, CESO V, kauban sila si Gwennilyn Pauline A. Vaquilar, LGOO II ug Ryan Cloyd Q. Villanueva, LGOO II, ang nagpahigayon sa maong validation.

Si Provincial Adminstrator Engr. Josie Jean Rabanoz kauban ang mga labaw sa mga departamento sa kapitolyo ang miabi-abi sa validation team, ug nakigduyog sa patigayon.

“So I’m very thankful to Ma’am Yvette Tolentino Sunga nga siya ang head sa atong national validator’s karong adlawa. Uban sa iyaha si Gwen ug si Ryan. Daghan kaayong salamat gyud… With that, I think 99% percent nga na-accomplished na sa mga department head together with all the officials labi pa ang atong governor nga si Kuya Gov Edwin I. Jubahib nga very supportive sa atoang tanan, sa atong mga kalihukan, sa mga programs og mga activity sa atoa diri sa probinsya sa Davao del Norte. And so, with our officials, to mga board members and to our vice governor, kay without them also dili man pud nato ma-accomplish ang atoang mga things... Looking forward nga makuha gyud nato ang pinaka-prestigious award, the mother of all award,” malaumong pahayag ni PA Rabanoz.

Sa mensahe ni Governor Edwin “Kuya Gov” Jubahib pinaagi ni PA Rabanoz, iyang gipaabot ang kinasing-kasing nga pahalipay ug pagdayeg sa mga department heads sa ilang pagpaningkamot ug tinguha nga makab-ot pag-usab ang selyo sa maayong pagdumala.

Sa laing bahin, nagpadayag sa iyang dakong kalipay si ARD Sunga, tungod sa pagsulod sa probinsya isip potential passer alang sa national validation sa SGLG. Sumala niya, usa na lang sa napulo ka governance areas ang nahibilin ug nanginahanglan na lang og dugang koordinasyon sa nasyonal nga buhatan.

“Dako ang akong kalipay kay ang Davao del Norte naapil as potential passer sa national validation sa Seal of Good Local Governance. And out of the ten (10) national areas, ok man ang nine (9). Naa lang mi isa ka governance area nga kinahanglan pa’g further coordination with national office... Gitan-aw nato nga ang panerbisyo sa atong lokal nga mga opisyal ug sa atong personahe sa probinsya sa Davao del Norte, gibuhat ba nila alang sa katawhan sa Davao del Norte. Kana man gyud ang atong gusto, no? Nga ang gobyerno nagtrabaho para mapalambo nato ang kahimtang sa mga katawhan. But, we have the so called SGLG fund, the Seal of Good Local Governance fund. Dili kaayo ni siya dako but the province, if ever they make it, they will get the seal. Kana siya ang prestige nga kami sa napulo ka governance areas, maayo ang among pagdumala,” saysay sa ARD.

Matud sa DILG, ang official national validation results sa SGLG ipagawas karong Nobyembre, sundan sa awarding ceremony sa umalabot nga Disyembre ning tuiga.

Ang SGLG awards usa ka insentibong dungog ug pag-ila nga programa sa DILG, base sa performance sa usa ka Local Government Unit sa napulo (10) ka nag-unang bahin sa pagdumala, sama sa: Fiscal administration, Disaster Preparedness, Social protection, Peace and Order, Business-friendly. ug Competitiveness, Environmental Management, ug Tourism, Culture and the Arts.

Writer: Nestor H. Mata, Jr. 

 

 

 

DavNor News

nainggo