Wala pay Septyembre nangandaman nang daan ang probinsya sa mga kalihokan alang sa pagsaulog sa ika-122 Anibersaryo sa Serbisyo Sibil sa Pilipinas. Niadtong Agosto 26, nagpulong ang bag-ong mga opisyales sa Council of Human Resource Management Practitioners sa Davao del Norte (CHRMP) 2022-2023 sa unang higayon alang sa pagplastar sa mga programa sa usa-ka-bulang selebrasyon sa Civil Service Commision karong Setyembre.

Atol sa maong tigum, gipahigayon sab ang buena mano nga paglusad sa maong kasaulogan sa panguna ni CSC-DavNor Provincial Director Nelly L. Esperanza. Mapasigarbuhong giangkon sa direktor ang himsug nga relasyon tali sa komisyon ug sa probinsya lakip na ang ubang mga ahensiya sa panggamhanan.

“We have a very strong partnership with the provincial government of Davao del Norte and with the other local government units across the province and the other line agencies, government owned and controlled corporations, state universities and colleges, and local colleges,” matud ni Esperanza.

Karong tuiga, gibahin sa senemana ang mga aktibidad ubos sa nagkalain-laing tema. Sa unang semana, Linggo ng Lingkod Bayani diin pakusgan ang paghata’g tinuoray nga serbisyo publiko. Sa ikaduhang semana, ubos sa temang Linggo ng Paglilinang ng Yamang Tao, mga kalihokan sa pagkat-on ug pagpalambo sa kahanas sa mga empleyado.

Samtang sa ikatulong semana, ang Lingkod ng Malasakit, manggawas ang mga kawani gikan sa ilang mga buhatan sa paghatud serbisyo sa lokal nga komunidad. Ug sa katapusang semana, Linggo ng Pasasalamat, ang pag-ila ug pasalamat sa mga sulundong empleyado sa ilang maayong natampo sa gobyerno labi na sa panahon sa pandemya.

“Ang ato gyung ginahimo karon labi na sa paghatag og mga competency interventions to our government workers to prepare them to really face head-on the fourth industrial revolution. So, that’s what we are doing especially for this monthly-long celebration of Philippine Civil Service Anniversary,” saysay sa direktor.

Isip bag-ong chairman sa DavNor CHRMP, gidumalahan ni Provincial Human Resource and Management Officer Edwin A. Palero ang pagplastar ug pagtakda sa mga programa apil na ang paghimo og courtesy calls sa matag LGU ug binulan nga pulong, katimbang ang mga NGOs, GOCCs ug ubang ahensiya aron masigurong hapsay ug malampuson kining matuman.

Sulti sa CHRMP chairman nga tinguha sa maong konseho ang pagpaambit sa mga best practices sa matag institusyon aron nga makopya ang mga maayong binuhatan ug sistema nga makapadali sa mga bulohaton.

“We will try our best together with the officers nga mabati gyud sa mga agency heads, sa mga mayors nga naa gyuy ikatabang ang council sa pag-improve sa implementation sa human resource management function sa ilang mga opisina through the intervention, through the collaboration sa Civil Service Commission ug sa Council of Human Resource Management Practitioners,” pasalig sa bag-ong chairman.

Ang DavNor capitolio sa kasamtangan, anaa sa level 2 sa Program to Institutionalize Meritocracy and Excellence in Human Resource Management (PRIME-HRM), ang centerpiece program sa CSC. Aron motaas ang lebel, lakip sa pagpangandam karong tuiga ang mga rekisitos niini.

Matud ni Palero, ubos sa maong programa ang Occupational Safety and Health Standards nga maoy tutukan sa probinsya diin ipanigurong ang mga opisina luwas, komportable ug nindut trabahoan. Lakip niini ang pag-atiman sa kahimsug sa panlawas ug panghunahuna sa mga empleyado ug opisyal.

Ang mga programang namugna na pinaagi sa mando ni Gobernador Edwin “Kuya Gov” I. Jubahib ang physical fitness gym ug ang Psychological First Aid ug Stress Management Session alang sa mga personahe.

Dugang niini, uban ang kahinam, gibutyag ni Palero ang mga bag-ong pasilidad nga mahimong highlight sa nasangpit nga selebrasyon sama sa Team Tambayan, DavNor Employees Health Clinic ug ang implementasyon sa Health and Wellness Automated System. Kining tanan dungang ilusad sa Septyembre 12, 2022.

“Kung mohatag man gali ta’g serbisyo sa mga katawhan, well of course, dapat pud ready ang mga empleyado nga mohatag. Dili luyahon, dili troubled minds. So, as an HR ug si Kuya Gov, sa iyang panghunahuna isip Kuya ug Amahan sa probinsya, naa gyud siyay kasingkasing nga moalaga sa mga empleyado sa capitolio kay ang mga empleyado sa capitolio is an essential, important resource. Katong mga programa nga iyang gusto nga maimplementar, sebisyo nga mahatag sa katawhan, mahatag kini as expected because capacitated ang mga empleyado kay dili mga masakiton, dili mga luyahon, dili mga utok nga mura’g nawala na, nayuring na ang utok tungod sa stress,” pagpasabot ni Palero.

Writer: Jun Rey Villanueva
Photos: Kier Martinez, PHRMO

 

 

 

DavNor News

nainggo