Napili sa Department of Education (DepEd) ang Probinsya sa Davao del Norte nga mahimong ‘host’ sa National Kick-off Ceremony sa 2022 National Teacher’s Month kagahapon, Septyembre 6, 2022, sa DavNor Gym, Sports and Tourism Complex, Mankilam, Tagum City.

Gipangunahan ni Vice President ug Education Secretary Sara Z. Duterte ang nasud Pilipinas sa paghatag pasidungog sa mga magtutudlo tungod sa ilang kadasig, katakus ug gahum sa pag-umol sa kaugmaon sa mga kabataan.

Mitambong sa seremonyas ang mga regional, division, ug school heads sa DepEd Region XI, ug pati na sab ang mga dagkong opisyal sa host division nga Davao del Norte.

Gani, nakigduyog sab virtually ang mga magtutudlo gikan sa lainlaing parte sa tibuok nasud pinaagi sa LIVE Simulcast sa Official Facebook Pages sa DepEd Philippines, One DavNor Network, ug PTV DavNor 48.

Sa iyang online message, gidayeg ni VP Sara ang kadasig, kaisog, dedikasyon, ug propesyonalismo sa mga titser sa pagtudlo sa kabataan taliwala sa lainlaing mga katalagman.

“Napatunayan at nasakishan natin na dumaan man ang maraming bagyo, lindol, baha, at kung anu-ano pang sakuna, ang ating mga guro ay babangon at babangon para sa edukasyon ng mga bata… Bilib ako sa tibay ng puso ninyo. Sinasalamin ninyo ang tibay at puso ng ating bansang Pilipinas,” sulti ni VP Sara.

Giila sab ni DepEd-XI Regional Director Dr. Allan G. Farnazo ang bayanihong paningkamot sa mga magtutudlo nga nagpabiling llig-on ug mapasiboon taliwala sa daghang mga hagit ug kalamidad, sama sa bagyo, baha, ug bisan pa sa pandemya nga nasinati sa tibuok kalibutan.

“Kahit ano pa man ang hamon na hinaharap, napakahirap man, o sa anumang mga sitwasyon, namumukod-tangi ang kabayanihan ng mga guro. On the start we had a difficulty, pero dahan dahan ang mga teachers ay nakapagbuo ng kanilang appropriate responses… Sa inyong lahat na mga guro na nagsimula na maniwala sa pangarap ng bawat isa, maraming maraming salamat. Kinikilala kayo ng mundo hindi lamang sa inyong pagka guro ngunit sainyong naiambag na kontribusyon sa paghubog ng iba't-ibang propesyon… No one became so great, no one became so accomplished without the teacher who taught that great person,” pagdayeg sa Regional Director.

Samtang, gikalipay ni Governor Edwin “Kuya Gov” I. Jubahib nga napili sa DepEd ang Probinsya sa Davao del Norte nga mahimong ‘host’ sa paglusad sa month-long celebration sa National Teacher’s Month karong tuiga.

Sulti sab sa gobernador nga isip pag-ila sa mga sakripisyo ug kakugi sa mga magtutudlo, gipalig-on sa Probinsyal nga Panggamhanan ang suporta niini sa sektor sa edukasyon, dili lang panahon sa Brigada Eskwela, aron masiguro ang luwas ug nindot nga mga tulonghaan sa Probinsya.

“Especially na sa mga far-flung areas. Kaniadto nga lisod kaayo ang ilahang pag-adto sa eskwelahan tungod sa problema sa kalsada. Na-address na nato na karon sa atoang Probinsya… Ang teachers’ quarters sa mga far-flung areas, nahimoan na pud nato. Ug usab ang mga eskwelahan nga kaniadto walay magamit—karon aduna na tay mga makeshift school nga maoy nagamit sa mga kabataan. Usab ang request sa’toang provincial schools superintendent nga si Dr. Dee Silva; tanan niyang gi-request sa atoa, ato kining gi-provide—sama sa mga gadgets, laptop, mga computers, o ang annual budget nga ilahang ginarequest satoa, ato ning na provide tanan,” saysay ni Kuya Gov.

Gawas niini, kahinumdoman sab nga gipaambit sa Probinsya sa Davao del Norte, subay sa mando ni Kuya Gov, ang pasilidad niini sa PTV-DavNor Channel 48 ug DXNR-FM Radio 91.1 FM alang sa TV and Radio-Based Instruction program sa DepEd, ilabi na panahon sa lockdown.

Writer: Gwyn Kelly O. Lobitos / Noel P. Baguio

 

 

 

DavNor News