Taliwala sa kusog nga hugyaw sa mga opisyales ug empleyado sa Kapitolyo, giablihan ni Governor Edwin “Kuya Gov” I. Jubahib ang Davao del Norte Capitolympics 2022, isip kinadayagan sa pag-abli sa Civil Service Month.

Unom ka clusters gikan sa 18 ka mga opisina sa Kapitolyo ang magtigi sa 27 ka mga sports events sa gipakusog nga padula, human duha ka tuig nga nasuspindi kini tungod sa pandemya.

Dungan niini, gisabay pud ang paglusad sa duha ka mga programa ni Kuya Gov alang panlawas sa mga empleyado, nga nahimong kabahin sab sa pag-abli sa 122nd Philippine Civil Service Anniversary (PCSA).

Mao kini ang DavNor Employee Health Clinic and Teen Tambayan Center ug ang DavNor Health and Wellness Automated System (DNHWAS).

Gihataga’g hibug-aton ni Kuya Gov ang katuyuan sa Capitolympics sa paglig-on sa burukrasya sa Kapitolyo, pinaagi sa gahum sa sports aron tabangan paglig-on ang disiplina, kinaiya ug kabaskog sa mga empleyado.

“Our primary goal in holding the Capitolympics is to create a strong organization, where our employees grow and lead in a culture of excellence grounded on a foundation of values… (Ang unang katuyuan sa Capitolympics mao ang pagmugna sa lig-on nga organisasyon, diin ang atong mga empleyado magatubo ug manguna sa kultura sa pagkamaayo sigun sa pundasyon sa mga mithi),” sulti sa gobernador.

Gipangunahan ni Kuya Gov ang Flag Raising Ceremony ug parada sa mga empleyado, kuyog si Civil Service Commission (CSC)-XI Regional Director Cyril Nathan Eamiguel, Vice Governor De Carlo Uy, mga miyembro sa Sangguniang Panlalawigan, ug mga department heads ubos ni Provincial Administrator Engr. Josie Jean Rabanoz.

Gidayeg ni Eamiguel ang kalampusan sa probinsiya sa paghatag interbensiyon alang sa tinibuok nga paglambo sa gitawag niyang ‘servant heroes’, kon alagad nga mga bayani.

“We congratulate the Provincial Government of Davao del Norte, under the leadership of Governor Edwin Jubahib… for putting into the fore the development of the potentials and wellbeing of the provincial government workforce,” ingon niya.

Gipasalamatan usab ni Department of Health (DOH)-XI Regional Director Dr. Annabelle Yumang si Kuya Gov sa pagtukod sa employee clinic, Teen Tambayan Center ug DNHWAS, aron masiguro ang pisikal ug mental nga kahimsog sa mga empleyado.

“Makatrabaho kita’g tarong kung physically and mentally fit kita,” sulti ni Yumang.

Miduyog sab sa maong okasyon sila Department of Interior and Local Government (DILG)-XI Regional Director Alex Roldan ug PopCom-XI Regional Director Ma. Linadores Delicana, nga girepresentahan ni Sheryl Jane Fernandez.

Magpabibo sa maong okasyon ang Ginoo at Bb. Capitolympics ug Zumba Dance Contest. Apil sa mga aktibidades sa Civil Service Month ang Learning and Development (L&D) sessions, Literary and Musical Contest, ug ang Grand Awarding Ceremony nga ipahigayon sa Setyembre 27, 2022.

Writer: Noel P. Baguio

 

 

 

 

 

 

 

DavNor News

nainggo