Gipangunahan ni Gobernador Edwin “Kuya Gov” Jubahib, ang paglusad sa Teen Tambayan Hub ug DavNor Teens Hopeline, nga anaa nahimutang sa Door No. 6, Davao del Norte Sports and Tourism Complex, Mankilam, Tagum City, niadtong Septyembre 12, 2022.

Gitambongan kini ni Vice Governor Decarlo “Oyo” Uy kauban ang mga Sangguniang Panlalawigan Board Members gikan sa duha ka distrito, mga labaw sa departamento sa kapitolyo, ug mga bisita gikan sa rehiyon nga sila si Department of Health Regional Director Dr. Anabelle Yumang, POPCOM Regional Director Maria Linadores Delicana, ug Department of Interior and Local Government Regional Director Alex Roldan.

Ang maong pasilidad gimugna aron sa paghatag interbensyon sa pisikal ug mental nga panginahanglan sa mga batan-on nga nagpangidaron gikan 10 hangtud 24 anyos. Mohatag kini’g libreng konsultasyong medical ug eksaminasyon, psychosocial risk assessment and intervention, counselling alang sa mga indibidwal o grupo, HIV Testing, Health and Wellness Activity, mga paugnat sa kusog, Livelihood Training, Bible Studies ug daghan pang uban.

Sumala ni Christy Sanico, ang Program Manager sa nasangpit nga pasilidad, nga kini ang pinakaunang teen tambayan sa tibuok Rehiyon XI. Gidumala ug gipadagan kini sa probinsyal nga panggamhanan nga andam moserbisyo sa mga kabatan-onan sugod alas-8 sa buntag hangtud alas-5 sa hapon.

Gidayeg ni Dr. Yumang si Governor Jubahib gumikan sa dakong suporta niini sa health and wellness program sa probinsya diin makatabang matud pa, sa kahimsug pisikal ug panghunahuna sa mga empleyado sa kapitolyo.

“𝘕𝘢𝘭𝘪𝘱𝘢𝘺 𝘱𝘶𝘥 𝘬𝘢𝘢𝘺𝘰 𝘮𝘦 𝘧𝘰𝘳 𝘵𝘩𝘦 𝘭𝘢𝘶𝘯𝘤𝘩𝘪𝘯𝘨, 𝘰𝘱𝘦𝘯𝘪𝘯𝘨 𝘰𝘧 𝘰𝘶𝘳 𝘵𝘦𝘦𝘯 𝘵𝘢𝘮𝘣𝘢𝘺𝘢𝘯 𝘩𝘶𝘣. 𝘛𝘩𝘢𝘵 𝘪𝘴 𝘧𝘰𝘳 𝘰𝘶𝘳 𝘵𝘦𝘦𝘯𝘴. 𝘒𝘶𝘯𝘨 𝘯𝘢𝘢 𝘴𝘪𝘭𝘢𝘺 𝘮𝘨𝘢 𝘱𝘳𝘰𝘣𝘭𝘦𝘮𝘢 𝘢𝘴𝘢 𝘴𝘪𝘭𝘢 𝘮𝘰𝘢𝘥𝘵𝘰. 𝘈𝘯𝘥 𝘢𝘭𝘴𝘰, 𝘵𝘩𝘦 𝘩𝘦𝘢𝘭𝘵𝘩 𝘤𝘭𝘪𝘯𝘪𝘤. 𝘕𝘢𝘬𝘪𝘵𝘢 𝘯𝘢𝘬𝘰 𝘺𝘰𝘶 𝘩𝘢𝘷𝘦 𝘵𝘩𝘦 𝘩𝘦𝘢𝘭𝘵𝘩 𝘤𝘭𝘪𝘯𝘪𝘤, 𝘸𝘩𝘪𝘤𝘩 𝘪𝘴 𝘢𝘭𝘴𝘰 𝘢 𝘱𝘢𝘳𝘵 𝘴𝘢 𝘢𝘵𝘰𝘢𝘯𝘨 𝘮𝘨𝘢 𝘦𝘮𝘱𝘭𝘦𝘺𝘢𝘥𝘰 𝘰𝘳 𝘴𝘢 𝘢𝘵𝘰𝘢𝘯𝘨 𝘰𝘤𝘤𝘶𝘱𝘢𝘵𝘪𝘰𝘯𝘢𝘭 𝘩𝘦𝘢𝘭𝘵𝘩 𝘢𝘯𝘥 𝘴𝘢𝘧𝘦𝘵𝘺 𝘴𝘢 𝘮𝘨𝘢 𝘦𝘮𝘱𝘭𝘦𝘺𝘢𝘥𝘰 𝘯𝘨𝘢 𝘧𝘳𝘰𝘮 𝘵𝘪𝘮𝘦 𝘵𝘰 𝘵𝘪𝘮𝘦 𝘬𝘶𝘯𝘨 𝘥𝘶𝘯𝘢 𝘵𝘢𝘺 𝘣𝘢𝘵𝘪𝘰𝘯. 𝘕𝘰𝘵 𝘰𝘯𝘭𝘺 𝘬𝘶𝘯𝘨 𝘯𝘢𝘢 𝘵𝘢𝘺 𝘣𝘢𝘵𝘪𝘰𝘯 𝘣𝘶𝘵 𝘵𝘰 𝘮𝘰𝘯𝘪𝘵𝘰𝘳 𝘵𝘩𝘦 𝘩𝘦𝘢𝘭𝘵𝘩 𝘰𝘧 𝘵𝘩𝘦 𝘦𝘮𝘱𝘭𝘰𝘺𝘦𝘦,” pagdayeg ni Yumang.

Ang Teen Tambayan dunay binansay nga Adolescent Facilitator nga andam maminaw sa mga problema sa kabatan-onan ug mohatag sa ilang bililhong tambag. Ang mga teenager nga moduol sa nasangpit nga pasilidad, dili angayang mabalaka sanglit ang tanan nilang isulti isipong kompidensyal, gawas lang kung makadaut sa ilang kaugalingon o sa uban.

Writer: Nestor H. Mata, Jr.
Photographer: Philip John Verallo

 

 

 

DavNor News