Abli ug andam na moserbisyo ang DavNor Teen Tambayan Hub, usa ka ‘safe space’ nga abtanan sa mga teenager o kabatan-onang Dabaonon nga gustong mangayo og medical ug psychosocial support.

Gipangunahan ni Gobernador Edwin “Kuya Gov” I. Jubahib ang paglusad sa DavNor Teen Tambayan Hub nga nahimutang sa Door No. 6, Davao del Norte Sports and Tourism Complex, Mankilam, Tagum City.

Sa tuyo nga matabangan ang mga batan-ong dunay medikal, emosyonal, ug sikolohikal nga panginahanglan, ang DavNor Teen Tambayan Hub abli gikan Lunes hangtod Biyernes, 8:00 AM hangtod 5:00 PM.

Nagatanyag kini’g libreng health and psychosocial services alang sa mga batan-ong nag-edad og 10-24 anyos, sama sa free medical consultation and examination, psychosocial risk assessment, counseling services, referral services, HIV testing, research facility, sporting activities, recreational activities, music and arts, ug daghan pa.

Dugang pa, sa pakigtambayayong sa DavNor911, gilusad sab atol sa kalihokan ang DavNor Teen Tambayan Hopeline, usa ka 24/7 hotline nga matawagan sa mga batan-on kung dunay mga pangutana bahin sa ilang reproductive health, sexuality, mental health, ug uban pang psychosocial concerns.

Alang sa Globe ug TM subscribers nga dunay load, mamahimong motawag sa 911 or 0997-643-3736. Alang sa Globe ug TM subscribers nga walay load, i-dial ang 112. Ug alang sa Smart and Talk N Text subscribers, mamahimong motawag sa mga numero 0908-813-2007 o 0912-274-8931.

Ang DavNor Teen Tambayan Hub magsilbing luwas nga luna sa mga batan-on aron magtuon sa ilang mga leksyon sa eskwelahan ug labaw sa tanan makahatag sa hinanaling serbisyong medikal ilabi na sa aspetong psychosocial.

Tinguha ni Kuya Gov nga mahatagan og pagtagad ang mga kabatan-onan sa Davao del Norte dili lamang sa pisikal nga aspeto, apan apil na sab ang sikolohikal o mental nga aspeto. Sumala sa gobernador, ang mga batan-on maoy paglaum sa atong kaugmaon.

Writer: Gwyn Kelly Lobitos
Photographer: Philip John Verallo

 

 

 

DavNor News