Napuno ang tibuok DavNor Gym og hugyaw ug kasadya dihang gipasundayag sa mga empleyado sa Kapitolyo ang ilang tinagong mga talento atol sa 2022 DavNor Literary and Musical Contest niadtong Lunes, Septyembre 26, 2022 sa DavNor Gym, Sports and Tourism Complex.

Nagtigi ang mga representante gikan sa lainlaing opisina sa Kapitolyo sa nagkadaiyang kompetisyon sa literatura ug musika.

Gipakita sa mga empleyado ang ilang kaalam ug pagmanggad sa serbisyo sibil pinaagi sa literary competitions nga naglakip sa Extemporaneous Speaking, Picture Interpretation, ug Musical Balak.

Samtang, nakiindak ug nakiawit ang tanang nanambong sa musical competitions nga vocal solo, vocal duet, ug dance contest remix.

Matod ni Provincial Human Resource Management Officer (PHRMO) Edwin A. Palero, tumong sa maong kalihokan ang pagpagawas sa mga talento sa mga empleyado sa Probinsyal nga Panggamhanan nga kanunay lang nakatago.

“Kining mga talents daw sa mga empleyado, hidden lang daw permanente–ginataguan. Unya manggawas lang daw kung naay mga activities sa mga opisina. Karon, atong gipangitaan og avenue o pamaagi nga mapagawas gyud [ang ilang mga talento],” sulti ni Palero.

Dugang pa sa PHRMO Head nga sa pag-ila sa mga talentong anaa sulod sa Kapitolyo, dili na kinahanglan pa nga mag-imbita og mga maglilingaw gikan sa pribadong mga organisasyon sa gawas kon adunay mga event.

Sulti sab ni Provincial Administrator Engr. Josie Jean Rabanoz nga ang maong kompetisyon maghatag og kapahulayan sa mga empleyado gikan sa walay pu-as nga trabaho ug mopalig-on sa ilang panag-uban ug panaghigalaay isip hiniusang organisasyon.

“Davnor Music and Literary Contest is more than merely entertainment. This activity relieves our stress from frantic office work, celebrates diversity of our capitol employees, and fosters social connection among our employees. This social connection will strengthen the bond of our workforce as a united organization with a unified goal of serving the constituents of Davao del Norte to the best of our abilities,” pahayag ni Rabanoz.

Ang gihisgotang Literary and Musical Contest kabahin sa 2022 DavNor Capitolympics nga subay gihapon sa pagselebrar sa 122nd Philippine Civil Service Anniversary.

Writer: Gwyn Kelly O. Lobitos

 

 

DavNor News