Sugod Oktubre 10, ning tuiga, pwede nang magamit sa mga Dabaonon ang bag-ong rubberized track oval sulod sa Davao del Norte Sports and Tourism Complex, Mankilam, Tagum City.

Mismong si Governor Edwin “Kuya Gov” Jubahib ang nanguna sa blessing ug inagurasyon sa maong pasilidad, inubanan ni Vice Governor Decarlo Uy, mga board member, mga pangulo sa departamento ug mga kawani sa kapitolyo lakip sab ang pipila ka mga atleta sa siyudad sa Tagum.

Gikalipay ni Kuya Gov ang subling pag-abli sa maong pasilidad human sa sobra duha ka tuig nga pagsirado niini subay sa kamandoan batok sa pandemyang covid-19.

“Kabalo ko nga kining maong project dako kaayong tabang sa atong mga empleyado kay tungod niining maong track oval, kabalo ko nga gusto kaayo mo nga magsige’g exercise, magsige’g dagan. Kay siguro sa tibuok Mindanao, naa ta sa first o number 3 probinsya nga adunay rubberize oval. Ang project cost ani amounted to P 35,000,000.00. Mahal kaayo, so dapat lang ampingan nato nga mo-long last ni up to ten (10) years nga pinakadugay,” sulti sa gobernadora.

Sumala pa ni Giovanni I. Gulanes, ang Provincial Sports Youth and Development Officer, nga perpekto nga regalo ni Kuya Gov ang subling pag-abli sa bag-ong rubberized track oval sa mga katawhan ning probinsya, sanglit dako kini’g ikatabang sa pagpalambo ug pagpahimsog sa pisikal nga aspeto sa mga tawo. Gikan sa mga atleta, empleyado sa kapitolyo og bisan pa man ang mga yanong lungsoranon makabenepisyo niini.

“Ang oval para ni sa kadaghanan, para sa atleta kay kung wala man gud kay oval ani malugos ta’g champion labi na athletic sa dagan kay sinukod man gud na. You do your practice every day mailhan nimo kung gapaspas ka o dili kay sinukod man ang imong daganan. Ikaduha, para pud ni sa mga empleyado kanang gikapoy na’g trabaho, gusto magpapayat moari ra diri. Kini para pud ni sa mga naga-maintain, naay maintenance nga dili empleyado, general public nga naga-recuperate medically gusto lang maglakaw-lakaw aron momubo ang sugar, momubo ang cholesterol. Kini para ni sa pamilya, walay gibati, dili atleta pero gusto lang nila uban, maggunitay’g lamot, murag mag- picnic. This is for everyone for health and wellness, for family bonding. Perpekto nga regalo ni Kuya Gov Edwin Jubahib para sa komunidad dinhi sa Davao del Norte,” saysay ni Gulanes.

Dugang ni Gulanes nga dako ang posibilidad nga maka-produce ang probinsya og maayong mga atleta ilabi na sa track and field kay aduna na silay pasilidad nga libreng magamit sa ilang pagbansay.

Kahinumdoman, niadtong tuig 2015 nagamit ang DavNor Sports and Tourism Complex alang sa pagpahigayon sa Palarong Pambansa.

Writer: Nestor Mata, Jr.
 

DavNor News