Sa pagbalik-arangkada sa kalamboan sa probinsya, gipasalig ni Governor Edwin “Kuya Gov” Jubahib ang paglig-on sa mga polisiya ug programa ubos sa iyang ika-duhang termino aron sa tumong nga walay mabiyaan nga sector sa katawhan.

Atul sa iyang mensahe sa unang Convocation Program sa Kapitolyo human ang kapin duha ka tuig nga pandemya, gisaysay sa gobernador ang inisyal nga agi sa iyang KUYA GOV NG MASA development agenda alang maluntarong kalamboan.

Molangkob niini ang mga programa alang pagwagtang sa kapobrehon ug kagutom, de kalidad nga edukasyon ug programa sa panglawas, daghang trabaho ug panginabuhian, imprastraktura, kalinaw, “gender equality” ug paghatag gahum sa kababayen-an, pagpanalipod sa kinaiyahan ug uban pa.

“This further includes our overarching principle of ensuring that no Dabaonon is left behind in the achievement of our goals and objectives (Lakip niini ang atong katuyuan nga walay mabiyaan nga Dabaonon sa atong pagkab-ot sa atong mga tumong ug tinguha alang kalamboan),” pagpaniguro ni Kuya Gob.

Gisaysay sa gobernador ang pipila sa mga kalampusan sa iyang administrasyon sulod sa usa ka gatos ka adlaw sa pagsugod sa iyang bag-ong mandato pagka-gobernador.

Lakip niini ang kapin 3,000 nga nakabenepisyo sa Zero-Billing program sa kantidad nga sobra P21 million, paglig-on sa e-Governance program, pagpanghatag sa 7,791 ka mga manok sa 2,319 benepisaryo sa DavNor KAAGAPAY program, nga nakadaog sa Davao Region SDG Champion Award.

Gitukod sab sa probinsiya ang P47-million transmitter station project alang sa PTV DavNor 48 ug naapil pud ang probinsiya isip finalist pag-usab sa Most Business-Friendly Province contest, ug daghan pang uban.

Pero, labaw pa sa mga award ang nabati nga kalipay ni Kuya Gov tungod sa dakong kaayohan nga nahatag sa iyang mga programa sa pag-uswag sa kahimtang sa katawhan.

“Beyond these awards, we feel greatest sense of fulfillment in uplifting the lives of our beneficiaries,” sulti sa gobernador.

Sa gibaniog nga makuhaan og P500 million ang budget sa probinsya sunod tuig tungod sa pag-ubos sa national tax allocation (NTA), gimando ni Kuya Gov ang pagpakusog sa tax administration aron modako ang kita sa probinsya.

Miaghat sab siya sa mga opisina sa Kapitolyo sa pagdaginot ug sa maalamon ug sakto nga paggasto aron makab-ot gihapon ang kinatas-an nga epekto sa pondo alang kaayuhan sa katawhan. (Nobags)

 

 

 

 

 

DavNor News