Nadawat sa probinsya sa Davao del Norte ang pasidungog isip 3rd Most Competitive Province sa tibuok Pilipinas karong tuiga.

Nasakmit sa lalawigan ang ikatulo nga pinakataas nga score sa Cities and Municipalities Competitiveness Index (CMCI) taliwala sa 81 ka mga probinsiya sa nasud, atol sa gipahigayon nga 10th Competitiveness Summit karong adlawa, October 20, 2022 sa PICC, Manila.

Butyag ni Provincial Administrator Engr. Josie Jean Rabanoz nga nakab-ot sa probinsiya ang maong kadaugan tungod sa maayong pagdumala ug mga reporma ni Governor Edwin “Kuya Gov” I. Jubahib, labi na sa pagpalambo sa ekonomiya, maayong panggobyerno, pag-uswag sa imprastraktura ug paglig-on sa katilingbang Dabaonon, bisan pa sa daghang mga hagit.

Sa ngalan ni Kuya Gov, kinsa tua sa opisyal nga biyahe sa South Korea, gidawat ni Rabanoz ang plake nga naghatag pasidungog sa probinsya, kauban si DTI Provincial Director Romeo L. Castañaga, Assistant Provincial Administrator Engr. Hazel Zafra ug Davao del Norte Investment and Promotion Center Chief Joevynar M. Miedes.

Mius-os ang national ranking sa probinsiya gikan sa ikaduhang puwesto sa CMCI sa mga tuig 2020 ug 2021, apan nagpabilin gihapon kini nga pinaka-competitive nga probinsya sa tibuok Davao Region.

“The key policy initiatives and sustained infrastructure development that we carried out to foster an environment conducive for businesses to flourish are working (Ang atong mga polisiya ug padayong paglambo sa imprastraktura malampuson sa pagkab-ot sa maayong kahimtang ug kalihokan sa patigayon),” sulti ni Kuya Gov sa iyang mensahe atol sa 1st Convocation Program sa Kapitolyo sayo ning bulana.

Ubos sa pagdumala sa gobernador, unang nadawat sab sa Davao del Norte ang Most Business-Friendly (MBF) Province Award sa tuig 2019, samtang nahimo kining Top 10 MBF Finalist sa mga tuig 2020 ug 2021.

Naglaum si Kuya Gov nga mabawi sa probinsiya ang Most Business-Friendly Province Award sa nasud human nga nahimo na pud kining finalist sa maong contest.

Samtang sigurado na siya nga makapasa na pud ang probinsiya sa pinakataas nga Seal of Good Local Governance (SGLG) karong tuiga.

Ang CMCI maoy usa ka tinuig nga paghatag sa National Competitiveness Council (NCC) og grado sa mga siyudad ug lungsod base sa sumada sa ilang score sa “economic dynamism, government efficiency, infrastructure, resiliency and introducing innovation”.

Writer: Nobags

 

 

DavNor News