Gidagsa sa mga young entrepreneurs sa Siyudad sa Tagum ang Youth Entrepreneurship Summit & Consumer Congress nga gipasiugdahan sa Department of Trade and Industry (DTI) didto sa Atrium, New City Hall niadtong Oktubre 26, subay sa selebrasyon sa Consumer Welfare Month.

Gitambongan usab kini sa mga dagkong magpapatigayon nga tag-iya sa mga supermarkets, department stores ug uban pang mga establisamento. Gumikan sa ilang kontribusyon sa pagprotekta sa mga konsumante, gitagaan sila sa Bagwis Award nga gilangkoban sa bronze, silver ug gold plaques. Ang pagbaton og mga welfare desk, consumer relation officer ug social responsibility activities sa ilang mga patigayon maoy bug-at nga basehan sa pag-angkon sa maong award gikan sa DTI.

Aron mas epektibo pa ang pagsunod sa mga patakaran ug regulasyon sa natad sa pagnegosyo, gihimo ang pagpinermahay sa Memorandum of Agreement (MOA) tali sa mga stakeholders, DTI ug uban pang ahensiya sa panggamhanan.

Gipahayag ni DTI Provincial Director Romeo L. Castañaga nga sentro sa DTI ang paghatag og saktong impormasyon, pagpakisayod ug pag-edukar sa mga young entrepreneurs aron maprotektahan ang ilang mga katungod batok scammers labi na karon nga nipatigbabaw ang digitalization. Gidasig usab niya ang mga kabataan nga mamuhonan.

“𝘈𝘯𝘨 𝘵𝘦𝘮𝘢 𝘮𝘢𝘯 𝘨𝘶𝘥 𝘴𝘢 𝘊𝘰𝘯𝘴𝘶𝘮𝘦𝘳 𝘞𝘦𝘭𝘧𝘢𝘳𝘦 𝘔𝘰𝘯𝘵𝘩 𝘧𝘰𝘳 𝘵𝘩𝘪𝘴 𝘺𝘦𝘢𝘳 𝘪𝘴 𝘴𝘶𝘴𝘵𝘢𝘪𝘯𝘢𝘣𝘭𝘦 𝘤𝘰𝘯𝘴𝘶𝘮𝘦𝘳𝘪𝘴𝘮 𝘸𝘪𝘵𝘩 𝘥𝘪𝘨𝘪𝘵𝘢𝘭 𝘢𝘨𝘦 𝘶𝘨 𝘯𝘢𝘬𝘪𝘵𝘢 𝘯𝘢𝘵𝘰 𝘯𝘨𝘢 𝘢𝘯𝘨 𝘱𝘪𝘯𝘢𝘬𝘢𝘩𝘢𝘴𝘢 𝘪𝘯 𝘵𝘦𝘳𝘮𝘴 𝘰𝘧 𝘥𝘪𝘨𝘪𝘵𝘢𝘭𝘪𝘻𝘢𝘵𝘪𝘰𝘯 𝘮𝘢𝘰 𝘢𝘯𝘨 𝘮𝘨𝘢 𝘺𝘰𝘶𝘵𝘩, 𝘢𝘯𝘨 𝘮𝘨𝘢 𝘬𝘢𝘣𝘢𝘵𝘢𝘢𝘯 𝘬𝘢𝘳𝘰𝘯. 𝘎𝘳𝘢𝘣𝘦 𝘱𝘶𝘥 𝘢𝘯𝘨 𝘪𝘭𝘢𝘯𝘨 𝘦𝘯𝘵𝘳𝘦𝘱𝘳𝘦𝘯𝘦𝘶𝘳𝘪𝘢𝘭 𝘮𝘪𝘯𝘥𝘴𝘦𝘵 𝘯𝘨𝘢 𝘣𝘪𝘴𝘢𝘯 𝘰𝘨 𝘮𝘨𝘢 𝘣𝘢𝘵𝘢 𝘱𝘢 𝘴𝘪𝘭𝘢,” sulti ni Castañaga.

Tinguha sa maong departamento nga ang mga kabatan-onang gustong magnegosyo o bisan si kinsang mga konsumante makaantigo moila ug moprotekta sa ilang mga katungod.

Writer: Lorna P. Tripoli
Photo: DTI-Davao del Norte