Gisugdan pagsaulog sa Davao del Norte Provincial Rehabilitation Center (DNPRC) ang National Correctional Consciousness Week, Oktubre 21-29, 2022 pinaagi sa pag-display sa mga livelihood projects nga hinimo mismo sa mga Persons Deprived of Liberty kon PDL.

Sa pagsugod sa selebrasyon, nagpahigayon og motorcade libot sa mga nag-unang kadalanan sa Siyudad sa Tagum paingon sa DNPRC Compound, sulod sa Kapitolyo, nga giduyogan sa mga service providers sama sa Couples for Christ, Seventh-Day Adventist denomination ug daghan pang uban.

Nakasentro ang okasyon sa temang "Mataas na kalidad ng serbisyong pangpiitan, Pagbabago ng PDL tiyak makakamtan".

Nagpasalamat si Provincial Rehabilitation Center Officer-In-charge Marilyn Erolon ngadto kang Governor Edwin “Kuya Gov” Jubahib sa suportang panginabuhian alang sa 163 ka mga PDL sama sa paghimo og alkansiya, wallet, Christmas sparkling balls ug uban pa.

Gawas pa niaana, gitagaan pud og dakong pagtagad ang mga panginahanglang medikal, dental ug legal pinaagi sa paglambigit sa Public Attorney’s Office aron mapadali ang proseso sa tagsa-tagsa ka mga kaso alang sa mga ginatawag nga mga ‘bakasyonista’.

Dugang ni Erolon nga ang mga PDL mamahimo na usab nga benepisyaro sa KAAGAPAY program ni Kuya Gov.

"Delikalidad... daghan na ‘tang gihan-ay nga mga programa para sa atong mga bakasyonista, dili lang gibutang nato sila sa selda atoa sab silang gi-develop," sulti ni Erolon.

Writer: Lorna P. Tripoli
Photos: Charlie Verdijo

 

 

 

DavNor News