Kay naguol sa kahimtang sa mga tribu nga nawad-an og panginabuhian, dali-daling misubida si Governor Edwin “Kuya Gov” Jubahib sa Sitio Nasilaban, Dagohoy, Talaingod, Davao del Norte, aron mohatag pagkaon, mga semilya, ug uban pang hinabang sa kapin libo ka mga IP families.

Nabalaka si Kuya Gov sa report nga iyang nadawat nga wala nay income ug wala nay makaon ang mga tribu tungod sa pag-undang sa pagpalit sa buyer sa ilang produktong abaca.

Gitunol sa gobernador ang dul-an usa ka libo ka mga food packs, sinako nga semilya sa mais, mga seedlings, ug uban pa, alang sa mga tribu gikan sa 16 ka mga sitio sa Talaingod.

Isip hinanaling solbad, mihanyag si Kuya Gov nga iyang paliton ang natingob nga mga abaca sa mga tribo, sugod ugmang adlawa.

Samtang pangitaan niya og maluntarong sulosyon ang problema sa tribo, giaghat sab niya sila sa pagtanum sa ubang mga high-value crops, nga ipuli sa abaca aron dili na nila masinati usab ang susamang problema.

Kauban ni Kuya Gov sila Davao del Norte Police Provincial Office Chief PCol. Antonio Alberio, Jr., mga kasundaluhan ug mga department head sa Kapitolyo.

Kuyog sab ni Kuya Gov ang iyang anak nga si Clarice Jubahib, nga mitunol sab sa mga biskit, kendi ug chichiriya sa mga batang tribo.

 

 

 

 

 

DavNor News