Kinasingkasing nga gidawat ni Governor Edwin “Kuya Gov” Jubahib ang upat ka mga miyembro sa New People’s Army nga misurender kaniya ganinang buntag sa Tahanan ng Gobernador.

Sulti ni Alyas Jaron nga naningkamot jud sila nga makaabot sa Davao del Norte aron dinhi mosurender tungud sa mga maayong butang nga ilang nadunggog mahitungod ni Kuya Gov, gikan mismo sa iyang mga kanhing kauban nga nauna misurender.

“Giantus jud namo nga makadiskarte nga makaabot jud mi sa Davao del Norte kay... nakita nako nga dinhi jud sa Davao del Norte maayo ang ilang pagtagad, pagtratar, ug pag-atiman sa kanhi kaubanan namo nga nagbalik-loob sa kagamhanan. Pasalamat ko’g dako kang Kuya Gov Edwin Jubahib sa iyang pagdawat kanamo, ug sa mga kauban nako kanhi nga nahiluna na karon dinhi,” sulti ni Jaron.

Saysay sa kanhi kalihim sa local guerilla unit sa Bukidon, kinsa 30 ka tuig sa kalihokan, nga ang kakapoy sa pakigbatok sa gobyerno, kagutom, kahadlok, pagduda sa kauban ug wala nay suporta sa masa maoy miaghat kanila aron mobalik sa sabakan sa gobyerno.

Dugang nakaaghat sab kaniya ang daghang mga programa ug proyekto nga nakaabot sa kabukiran aron sa pagtagad sa kahimtang sa mga kabus.

“Epektibo jud kaayo ang kampanya sa gobyerno. Kay bisan sa akong kaugalingon dulot jud to. Mao gani nga ania ko karon tungod kay nakita nako nga dili diay mi unsaon ug dili jud diay mi pasagdan o balibaran sa gobyerno sa among pagbalik,” ingon niya.

Kahinumduman nga sugod sa iyang paglingkod isip gobernador, kapin 3,000 na ka mga NPA ug miyembro sa Militia ng Bayan ang misurender kang Kuya Gov, ug kadaghanan dili taga-Davao del Norte.

"Para sa akoa lisod na pud balibaran kay basin mangluod ug dili na hinuon madayon pagsurender," sulti ni Kuya Gov.

Dugang niya nga tungod sa nakita nilang dakong prisiyensiya sa gobyerno ug daghang serbisyo kanila, kini ang rason nga mibalhin ang simpatiya sa mga lumulupyo sa kabarangayan ngadto sa gobyerno.

“Mao ni ang atong ginapadayon para sa maluntarong kampanya nga “insurgency-free province,” ingon sa gobernador.

Gitagaan ni Kuya Gov ang mga friends rescued (FRs) og P5,000 kada usa aron ilang magamit dayon sa pagbag-o sa kinabuhi, samtang gisiguro niya nga madawat jud nila ang tanang benepisyo sa ECLIP gikan sa mga ahensiya gobyerno.

Human gi-turn-over ni Kuya Gov ang mga friends rescued (FRs) kay Davao del Norte Police Provincial Office Chief PCol. Antonio Alberio, Jr., iya gihapon silang i-endorse kang 10th ID Commander MGen. Nolasco Mempin alang sa saktong intervention.

Nakadayeg si Alberio sa programa ni Kuya Gov alang kalinaw, labi na sa pagdawat sa mga FRs nga dili taga Davao del Norte.

“Maayo ang plano ug programa sa atong gobernador… Ok daw ang pag-accommodate sa FRs dinhi sa probinsya sa Davao del Norte, sa mga benepisyo nga ginahatag. Mao na nga gipili nila nga dinhi mag-surender,”

Gipahingusgan sab sa DNPPO Commander nga ginahanglan gihapon ang paglig-on sa programang kalinaw aron masiguro nga kanunay insurgency-free ang probinsiya.

“Magpadayon gihapon ang atong pag-monitor, labi na sa gitawag natong ‘white area’. Daghan tag programa nga kinahanglan gihapon ang suporta ug budget aron mapadayon ang atong pagka-insurgency-free sa Davao del Norte ug tibuok Region XI,” sulti ni Alberio.

 

 

 

DavNor News