Maluntarong solusyon ang tinguha sa paghan-ay sa Peace and Order and Public Safety Plan o POPS PLAN alang sa tuig 2023-2025. Kini agi’g pag-ila sa mga issues and concern nga dako ang epekto sa pagmintinar sa kahapsay ug kalinaw ug luwas nga katilingban.

Usa ka workshop activity ang gimugna sa Department of Interior and Local Government dinhi sa probinsya uban sa Provincial Planning and Development Office sa DavNor GSP Training Center, Capitol Compound, Tagum City niadtong Nobyembre 21-22, 2022.

Mga ahensya sa gobyerno sama BFP, PDRRMO, PSWDO, PADAC, PDEA, AFP, coastal guards ug Philippine National Police nagpadayag sa ilang mga tagsa-tagsa ka mga suhestiyon aron hingpit nga makab-ot ang kalinaw, pagpakgang sa pagkuyanap sa ilegal nga droga ug uban pang matang sa kriminalidad.

Sa ilang mga pagtuki base sa ilang dokumento ug data nga nahipos sulod sa miaging tulo ka tuig 2019, 2020 ug 2021 nasayran, nga tungod sa kakulang sa panginabuhian sa mga kanhi rebelde, sa mga kadalanan nga wala pa naabli ug nakonkreto nga mga giilang Geographically Isolated Disadvantaged Areas kon GIDA ug ingon man ang kakulang sa edukasyon maoy mga gamut-hinungdan sa pagdagsang kanhiay sa mga rebelde niadtong dili pa deklaradong free insurgency ug zero recruitment ang Davao del Norte.

Gipasabot ni Siegfred Butch Señoron, Monitoring & Evaluation Officer sa DILG Province, nga gikinahanglan lamang niini nga ma- “sustain” o mapadayon ang mga proyekto ug programa nga una nang gimontar ubos sa liderato ni Kuya Gov. Edwin I. Jubahib sa ingon, wala nay rason nga ang mga rebel returnees mobiya sa landong sa panggamhanan.

“𝘌𝘷𝘦𝘯 𝘵𝘩𝘰𝘶𝘨𝘩 𝘸𝘦 𝘢𝘳𝘦 𝘥𝘦𝘤𝘭𝘢𝘳𝘦𝘥 𝘢𝘴 𝘪𝘯𝘴𝘶𝘳𝘨𝘦𝘯𝘤𝘺 𝘧𝘳𝘦𝘦 𝘵𝘩𝘢𝘵 𝘥𝘰𝘦𝘴𝘯’𝘵 𝘮𝘦𝘢𝘯 𝘯𝘨𝘢 𝘮𝘢𝘨-𝘳𝘦𝘭𝘢𝘹 𝘵𝘢, 𝘪𝘯 𝘴𝘩𝘰𝘳𝘵 𝘥𝘪𝘭𝘪 𝘵𝘢 𝘱𝘢𝘴𝘢𝘺𝘰𝘯-𝘴𝘢𝘺𝘰𝘯 𝘭𝘢𝘯𝘨 𝘰𝘳 𝘦𝘢𝘴𝘺 𝘨𝘰𝘪𝘯𝘨 𝘵𝘶𝘯𝘨𝘰𝘥 𝘬𝘢𝘺 𝘪𝘯𝘴𝘶𝘳𝘨𝘦𝘯𝘤𝘺 𝘧𝘳𝘦𝘦 𝘯𝘢 𝘵𝘢. 𝘉𝘶𝘰𝘵 𝘱𝘢𝘴𝘢𝘣𝘰𝘵 𝘪𝘯𝘴𝘶𝘳𝘨𝘦𝘯𝘤𝘺 𝘧𝘳𝘦𝘦 𝘵𝘢 𝘬𝘢𝘺 𝘮𝘢𝘢𝘺𝘰 𝘢𝘯𝘨 𝘮𝘨𝘢 𝘱𝘳𝘰𝘨𝘳𝘢𝘮𝘢 𝘴𝘢 𝘢𝘵𝘰𝘯𝘨 𝘨𝘰𝘣𝘺𝘦𝘳𝘯𝘰 𝘬𝘢𝘳𝘰𝘯,” ingon ni Señoron.

Writer: Lorna P. Tripoli
 

DavNor News