Samtang iyang dali-daling gisulbad ang problemang panginabuhian sa tribu, giaghat sila pag-usab ni Kuya Gov sa pagpananom aron moasenso ilang kinabuhi.

"Maningkamot ang matag pamilya. Magtinabangay ta. Magtanum ta nga magtaum... Kinahanglan ang inyong mga yuta matamnan nato'g mga prutas, gulay, mais, kape, saging ug abaca," ingon niya sa mga tribu sa Sitio Basak, Talaingod, Davao del Norte.

Sulti ni Kuya Gov nga kung matamnan ang 114,000 ektaryang ancestral domain (AD) kon yutang kabilin sa Talaingod mahimong pinakadato ang mga tribu sa probinsya sa Davao del Norte.

Ang pag-adto ni Kuya Gov sa Sitio Basak mao ang ika-tulong higayon nga siya mitunol og hinabang sa mga tribu nga naapektohan sa pag-undang palit sa ilang produktong abaca nga hinungdan sa ilang kalisod.

Mitunol siya og mga 500 ka food packs, 500 ka semilya sa kape, 1000 semilya sa cardava, lima ka sakong mais pangsemilya, ug lima ka kilong liso sa mga gulay.

Kauban ni Kuya Gov sila Board Member Nicandro Suaybaguio, Jr., Board Member Prospero Estabillo, Jr., ug Board Member Datu Ariel Macla.

Aron mahupay sila sa ilang kalisud, sugod na pud nga gipalit sa gobernador ang ilang abaca.

Buot ni Kuya Gov nga mananom sa klase-klaseng crop ang mga tribu, aron dili na mausab ang ilang nasinating kalisud karon.

Kahinumdoman nga sa paglusad niya sa programang DavNor KAAGAPAY sa tuig 2020, gihatod ni Kuya Gov ang 29,000 seedlings sa kape, 9,900 ka semilya sa mahogany, 15,000 ka semilya sa Falcata, 30,000 ka semilya sa cardava, 1,000 ka seedling sa lubi, 10 ka sako nga semilya sa kamote, 253 ka pakete sa vegetable seeds ug 23,000 ka seedlings sa Tangongon abaca.