Gipangunahan ni Kuya Gov Edwin "Kuya Gov" Jubahib ang pagpanghatag sa mga hinabang sa 55 ka mga kanhi rebeldeng NPA kon “friends rescued” (FRs) nga mobalor sa P20 milyones ilawom sa localized ug national Enhanced Comprehensive Local Integration Program (E-CLIP).
Lakip niini ang housing unit gikan National Housing Authority (NHA), P20,000 nga Livelihood Settlement Grant (LSG) gikan sa Department of Social Welfare and Development (DSWD), P10,000 gikan sa Kapitolyo, ug P4,270 gikan sa DOLE-TUPAD program. Lahi pa niini ang dugang ganti nga ilang madawat kung duna silay masurender nga armas.
Sagad niini nga mga FRs nag-operate ug gikan sa kasigbit nga mga probinsiya ug rehiyon pero dinhi sila nag-surrender sa Davao del Norte tungod sa mas daghang mga benepisyo nga ilang madawat ug maayong pagtratar kanila sa probinsiya, kasundaluhan ug kapulisan.
Gani, butyag ni Guerilla Front 3 Secretary Maximo Catarata, alyas Datu Makatindog, nga dili unta siya madayon pagsurender niadtong Abril 2022 kung dili si Kuya Gov mismo ang misundo kaniya sa Loreto, Agusan del Sur. Hinungdan kini nga nabungkag ang GF 3, ubos sa Southern Mindanao Region Committee (SMRC) sa NPA.
Kauban sa maong okasyon sila 10th ID Assistant Division Commander BGen. Allan Hambala, 1001st IB Brigade Commander BGen. Jesus Durante, 1003rd IB Brigade Commander BGen. Consolito P Yecla, DNPPO Chief PCol. Antonio Alberio, Jr., Vice Governor De Carlo Uy kauban sila Board Member Shirley Belen Aala, Nicandro Suaybaguio, Jr., Prospero Estabillo, Jr., ug Francisco Remitar, DILG Acting Provincial Director Jonathan Leybag, Provincial Prosecutor Norman Solis, ug Provincial Administrator Engr. Josie Jean Rabanoz.
