Pormal nga giablihan ang bag-ong opisina sa Tagum City Chamber of Commerce and Industry, Inc. nga nahimutang sa City Arcade Tagum, Ayala Ave., Apokon, Tagum City, niadtong Disyembre 7, 2022.
Sumala ni Engr. Aerol B. Conde, ang Presidente sa TCCCII, nga ang kamugnaan sa maong opisina, tubag sa ilahang dugay nang gihandom nga makaangkon og usa ka ekslusibong lugar alang sa mga miyembrong negosyante. Tumong sa maong grupo nga mas modaghan pa ang mga nanag-iya’g negosyo dinhi sa Siyudad sa Tagum nga mosalmot sa ilang organisasyon.
“Ang Tagum City Chamber of Commerce is a non-profit organization. Actually, ang chamber of commerce is a nationwide organization which composed of cities and province. So, kami sa chamber, isa na sa mga plan namo nga mag-training about accounting, about management. So, kaning office mura’g blangko lang kay gamiton namo na as training facility pud para sa mga new members nga gusto mag-train. Mag-create mi’g training and programs kung unsaon pagpalambo sa business,” sulti ni Engr. Conde.
Matud pa ni Admarie D. Marcelo, CPA, MM, nga adunay tulo ka mga katuyoan ang maong pundok aron mas pakusgan pa ang pag-engganyo sa mga bag-ong miyembro. Sa ingon nga pamaagi, daghan ang matabangan labi na sa pagbinayloay og ideya kabahin sa hisgutanang pagnegosyo.
“So ang mga three priorities is to strengthen the management system of the Tagum City Chamber. Part of that is the data, the data sa mga active members. Ang number two (2) is to intensify the recruitment efforts. Mao na nga naay mga quota ni sila. And number three (3) establish the public and private partnership. Ang damgo gyud sa board of director sa Tagum City Chamber lead by our President Aerol Conde to come up with specific programs that is aligned with the local development plan,” pagsaysay ni Marcelo.
Gibutyag ni Alicia Solayon, nga dunay daghang mga programa ang gisugdan pag-implementar sa chamber sama sa mentoring sa mga bag-ong negosyante ug adopt-a-school program. Plano sab sa maong grupo ang pagmugna og speech laboratory sa piling tulunghaan aron matabangan ang mga magtutungha makaankon og bag-ong kaalam.
“Isa sa pagtabang katong giingon sa DepEd nga adopt-a-chool program, in which nag-focus mi sa TVL, ‘yong technical-vocational na track. Isa pud sa giandaman namo karon katong pagtabang sa mga gustong magnegosyo kung unsaon pag-sustain, unsaon pagpabuhi, nga mao pud na ang gusto sa among president. Sa amo tanan, naa man mi kanya-kanyang mga expertise. So, we can put together ang among mga expertise aron ma-realize to nga programa: unsaon namo paghatag og mentoring, kung unsaon ‘yong mga technique in terms of financial literacy, accounting, management. So, lahat na aspeto sa negosyo. So, diha namo maipakita ang among corporate social responsibility,” pagsubay ni Solayon.
Hugot ang suporta sa probinsyal nga panggamhanan sa Davao del Norte sa TCCCII sa pagpanguna ni Governor Edwin “Kuya Gov” Jubahib, sanglit nahaum kini sa KUYA GOB NG MASA Development Agenda, nga nagtumong sa pagpalambo sa ekonomikanhong aktibidad og pamuhonan dinhi sa probinsya.
Writer/Photo: Nestor Mata, Jr.
