Malipayong gidawat ni Governor Edwin “Kuya Gov” Jubahib ang pinakataas nga “Beyond Compliant” award sa Davao del Norte sa 2022 Gawad Kalasag Seal for Excellence in Disaster Risk Reduction and Management (DRRM) and Humanitarian Assistance.
Mitunol kaniya sa maong award sila Department of National Defense OIC ug NDRRMC Chairperson Jose Faustino, NDRRMC Executive Director ug National Gawad Kalasag Committee Chairperson Raymundo Ferrer, ug DILG Secretary Benjamin Abalos, sa gipahigayon nga Gawad Kalasag National Awarding Ceremony karong adlawa sa The Manila Hotel, Metro Manila.
Nasakmit sa Davao del Norte ang pinakataas nga award sa disaster management tungod sa grado nga 2.60 nga nakuha niini sa maong national contest.
Sa katapusan, nasungkit na jud sa probinsiya ang pretihiyoso ug gikaibgan nga national award human ang sobra lima ka tuig nga nahimo kining kanunay’ng ‘regional winner’. Nag-inusara lang ang Davao del Norte nga nakakuha niini sa mga probinsiya sa Davao Region.
Ilawom sa pagdumala ni Kuya Gov, gipalig-on pag-ayo sa probinsiya ang kapabilidad niini sa disaster risk management ug climate-change adaptability, pinaagi sa lig-on nga pagdumala sa impormasyon ug paghatud sa mga kasayuran bahin sa mga katalagman, pag-expand sa weather monitoring ug early warning system ug pagpalit sa mga moderno nga mga emergency rescue vehicles ug equipment.
Apil niini ang 15 ka pick-up rescue vehicles, duha ka heavy-duty rescue vehicles nga dunay crane, lima ka heavy-duty rescue vehicles, crawler hydraulic excavator; crawler long-arm excavator, rubber boats, lima ka ambulansiya, ug duha ka mobile hospital ug duha ka double-cab rescue pick-ups.
