Gipaabot ang hinabang ni Kuya Gov. Edwin I. Jubahib kagahapong adlawa, Enero 4, 2023, pinaagi sa PSWDO ngadto sa pamilyang Libante, residente sa Purok 2, Barangay Cabaywa, lungsod sa Asuncion.

Bitbit sa mga kawani sa pagpanguna ni PSWD Head Rosalinda Rapista ang usa ka sakong bugas ug mga kinartong sardinas isip tabang sa nagbangutang pamilya human nga nalumos patay ang singko (5) anyos nga anak nga babae sa magtiayong Ruel ug Emma Libante. Ang maong bata gituohang nalumos sa dakong imburnal.

"Naa man ko sa balay nanghipos man ko kay padulong ang baha, naligo man siya, Mao to nga nangita ko sa ilaha ila Mary Jean, gitawag nako ug giligo nako. Human ligo giilisan nako pero nibalik siya og lakaw kay nabilin daw iya tsinelas sa kahoy. Mao na to last. Wala na nako siya nakit-an. Wala nako kabalo asa na siya dapit," dangoyngoy ni Mrs. Libante nga sumala pa dugay nakaplagan ang patayng lawas sa anak.

Nagdagayday man ang luha sa apohan nga si Roberto Alvarez apan dako iyang pasalamat sa gobernador sa hinabang nga gitunol kanila uban usab sa pag-abaga sa pagpahiluna sa patayng lawas sa bata.

Sa pikas bahin ang mobile kitchen ni Kuya Gov sa pagpanguna usab sa PSWDO ug PGO nagtunol og lugaw sa mga residente sa Barangay Cabaywa, Asuncion nga apektado sa baha nga nihubas na sa pagbisita sa PSWDO.

Writer/Photos: Lorna P. Tripoli

 

 

 

DavNor News